Diolch yn fawr, Dirprwy Lywydd. Mae'r gwelliannau yn y grŵp hwn yn gwneud gwelliannau drafftio technegol i'r hyn yr ydym wedi'i alw'n 'ddarpariaethau bwriad i'r gwrthwyneb' yn Rhan 2 o'r Bil. Dyna'r darpariaethau sy'n sicrhau ei bod yn bosibl i ddarnau unigol o ddeddfwriaeth wyro oddi wrth y rheolau dehongli cyffredinol yn Rhan 2 lle bo'n briodol. Maen nhw'n adlewyrchu'r ffaith mai bwriad Rhan 2 yw darparu set o ddarpariaethau dehongli diofyn, ond nid i gyfyngu ar ein deddfwriaeth.

Fel y dywedais yn ystod trafodion Cyfnod 2 gerbron y Pwyllgor, rydym bob amser yn chwilio am ffyrdd i wella'r ffordd y caiff Biliau eu drafftio, hyd yn oed ar ôl iddyn nhw gael eu cyflwyno yn y Cynulliad. Mae'r gwelliannau hyn yn deillio o'r broses honno a byddant yn golygu bod y Bil yn ymdrin â mater bwriad i'r gwrthwyneb yn syml ac yn gyson. Nid ydynt yn newid effaith gyfreithiol y Bil.

Mae'r gwelliannau yn effeithio ar adrannau 10, 27 a 32 o'r Bil. Mae pob un o'r adrannau hynny yn nodi Rheol ddehongli ddiofyn, ond mae'n dweud y gellir diystyru'r rheol drwy ddarparu darpariaeth benodol i'r gwrthwyneb. Effaith gyfunol y gwelliannau yn y grŵp hwn yw disodli'r darpariaethau bwriad i'r gwrthwyneb ar wahân yn adrannau 10, 27 a 32 ag un ddarpariaeth gyffredinol yn adran 4.

Mae'r gwelliannau hefyd yn golygu bod y Bil yn ymdrin â'r mater o fwriad i'r gwrthwyneb yn fwy cyson. Mae adrannau 10, 27 a 32 yn ymdrin â'r mater mewn ffordd ychydig yn wahanol ar hyn o bryd, gan adlewyrchu'r gwahaniaethau yn y darpariaethau presennol y maent yn seiliedig arnynt. Ond, ar ôl ystyried y rhain ymhellach, nid ydym yn credu bod angen cynnal y gwahaniaethau.

Yn benodol, mae adrannau 27 a 32 ond yn sôn am y posibilrwydd y gallai darpariaeth ddatganedig i'r gwrthwyneb gael ei chanfod yn y Ddeddf Cynulliad benodol neu'r is-offeryn sy'n cael ei ddehongli. Fodd bynnag, mae'n bosibl y gall fod darpariaeth benodol i'r gwrthwyneb mewn darn arall o ddeddfwriaeth, fel y Ddeddf y mae is-offeryn Cymreig yn cael ei wneud oddi tani. Mae eisoes yn wir y byddai unrhyw derfynau a bennir gan y rhiant-ddeddf yn cael blaenoriaeth dros y rheolau diofyn yn Rhan 2 o'r Bil, ond mae'r gwelliannau yn sicrhau na ellir darllen adrannau 27 a 32 fel pe baent yn awgrymu fel arall.

Dylai'r gwelliannau hefyd leihau'r posibilrwydd o unrhyw gamddealltwriaeth ynghylch a fyddai adrannau 27 ac 32 yn cael eu gweld yn effeithio ar allu Senedd y DU i ddeddfu ar gyfer Cymru. Bydd yr Aelodau'n gwybod bod y cyfreithiwr cyffredinol ar y pryd wedi ysgrifennu ataf yn ystod Cyfnod 2, yn gwrthwynebu'r ffaith bod Rhan 2 o'r Bil yn gymwys i is-ddeddfwriaeth a wneir yng Nghymru gan ddefnyddio'r pwerau a roddwyd gan Ddeddfau Senedd y DU. Nid oes unrhyw beth yn llythyr y Cyfreithiwr Cyffredinol wedi newid fy marn bod y Bil o fewn cymhwysedd deddfwriaethol y Cynulliad, a byddaf yn ymateb yn fanwl yn fuan iawn. Ond mae'r llythyr yn awgrymu efallai fod Llywodraeth y DU wedi ffurfio camargraff fod Rhan 2 yn effeithio ar ddeddfau a basiwyd yn San Steffan. I fod yn glir, nid yw'n gwneud hynny. Rwy'n gobeithio y bydd y gwelliannau hyn yn helpu i osgoi unrhyw gamddealltwriaeth.

Fel y dywedais, bwriad y gwelliannau hyn yw gwella symlrwydd, cywirdeb a chysondeb darpariaethau penodol yn Rhan 2 o'r Bil. Felly, maent yn adlewyrchu nodau cyffredinol y Bil i wella eglurder a hygyrchedd yng nghyfraith Cymru, ac rwy'n gobeithio y bydd yr Aelodau yn eu cefnogi.