Diolch yn fawr, Dirprwy Lywydd. Mae'r gwelliannau yn y grŵp hwn yn ymwneud ag ymadael â'r UE, ond nid ydynt mor ddadleuol ag y mae'r pwnc yn ei awgrymu. A dweud y gwir, maent i gyd yn dechnegol iawn.

Bwriedir i welliannau 5 a 6 sicrhau bod Rhan 2 o'r Bil yn adlewyrchu'n llawn y newidiadau cyfreithiol y mae Senedd y DU eisoes wedi'u gwneud mewn cysylltiad â gadael yr UE. A bwriad gwelliannau 7, 10, 11 a 12 yw darparu, yn syml er budd trefn dda, ar gyfer y posibilrwydd y gall Rhan 2 o'r Bil ddod i rym bellach cyn ymadael o gofio'r ansicrwydd parhaus ynghylch ein dyddiad ymadael.

O dan Ddeddf yr Undeb Ewropeaidd (Ymadael) 2018, bydd deddfwriaeth sy'n uniongyrchol berthnasol i'r UE, megis rheoliadau a phenderfyniadau, yn cael ei chadw yng nghyfraith ddomestig y DU ar y diwrnod ymadael. Gall deddfwriaeth ddomestig arall ddiwygio'r gyfraith Ewropeaidd honno fel y mae'n gymwys o'r diwrnod ymadael, ac yn ystod y misoedd diwethaf mae Aelodau wedi gweld sawl cyfres o reoliadau a fydd yn gwneud yr union beth hwnnw. Y canlyniad yw, o'r diwrnod ymadael, bydd dwy fersiwn o ddeddfwriaeth uniongyrchol Ewropeaidd: y fersiwn sydd wedi'i hymgorffori mewn cyfraith ddomestig yn y DU, a'r fersiwn Ewropeaidd sy'n parhau i fod yn gymwys yn aelod-wladwriaethau'r UE.

Mae gwelliant 5 yn mewnosod adran newydd yn y Bil sy'n egluro, ar ôl ymadael â'r UE, y bydd unrhyw gyfeiriad at ddarn o ddeddfwriaeth yr UE sy'n uniongyrchol gymwys yn gyfeiriad at y fersiwn a gedwir mewn cyfraith ddomestig, nid y fersiwn sy'n gymwys yn yr UE. Dyna'r hyn y byddem yn ei ddisgwyl beth bynnag, ond bwriad yr adran newydd yw osgoi dadleuon, yn union fel llawer o'r adrannau presennol yn Rhan 2 o'r Bil. Mae hefyd yn adlewyrchu newidiadau tebyg a wnaed i'r Deddfau dehongli sy'n berthnasol i rannau eraill o'r DU.

Mae gwelliant 6 yn ymwneud â gwelliant 5 ac yn mewnosod darpariaeth i egluro'r berthynas rhwng yr adran newydd ac adrannau 22 i 24 o'r Bil sy'n bodoli eisoes, sy'n ymdrin â chyfeiriadau at ddeddfwriaeth ddomestig.

Mae'r gwelliannau eraill yn y grŵp hwn yn ymdrin â'r ffaith y bydd ystyr rhai cyfeiriadau eraill at ddeddfwriaeth yr UE yn newid ar ddiwedd y dydd, o ganlyniad i Ddeddf yr UE (Ymadael) a'r rheoliadau a wnaed oddi tani.

Pan gafodd y Bil hwn ei gyflwyno, cafodd ei ddrafftio ar y dybiaeth y byddai'r DU wedi gadael yr Undeb Ewropeaidd cyn i'r Bil ddod yn Ddeddf, oherwydd, bryd hynny, roedd disgwyl i'r diwrnod ymadael fod ar 29 Mawrth. Wrth gwrs, mae'r diwrnod ymadael wedi'i ohirio ers hynny fwy nag unwaith, a bydd ar ôl yr adeg pan fyddwn yn disgwyl i'r Bil gael Cydsyniad Brenhinol. Ac os byddai unrhyw oedi pellach, efallai na fyddai'r diwrnod ymadael yn digwydd tan ar ôl i Ran 2 ddod i rym yn llawn. Nid ydym yn credu y gellir diystyru'r posibilrwydd hwnnw, felly rydym ni'n credu y dylai Rhan 2 ddarparu o leiaf ar gyfer y sefyllfa cyn y diwrnod ymadael yn ogystal ag ar ei ôl.

Mae gwelliant 7 yn mewnosod is-adran newydd yn adran 25 o'r Bil, sy'n ymwneud â chyfeiriadau at offerynnau'r UE. Os bydd adran 25 yn dod i rym cyn y diwrnod ymadael, bydd ei heffaith yn cael ei newid gan reoliadau sydd wedi'u gwneud o dan Ddeddf yr UE (Ymadael), felly mae'r gwelliant yn mewnosod arwyddbost i dynnu sylw darllenwyr at ddarpariaethau perthnasol y rheoliadau hynny.

Mae gwelliannau 10, 11 a 12 yn gwella'r diffiniadau yn Atodlen 1 i'r Bil sy'n ymwneud â deddfwriaeth Ewropeaidd. Bydd y gwelliannau yn ei gwneud yn glir y bydd y diffiniadau'n newid ar ôl y diwrnod ymadael. Bydd y newidiadau sy'n dod i rym ar y diwrnod ymadael yn adlewyrchu newidiadau sydd hefyd wedi'u gwneud i'r Deddfau dehongli sy'n berthnasol i weddill y DU.

Ni fwriedir i'r gwelliannau hyn gyflawni canlyniad gwahanol i'r hyn a nodir yn y Bil ar hyn o bryd, ond bwriedir iddynt sicrhau bod y Bil yn adlewyrchu'r ystod lawn o senarios posibl o ran amseriad ymadael â'r UE. Maent yn gwneud rhai o ddarpariaethau'r Bil ychydig yn fwy cymhleth, ond, yn anffodus, mae hynny'n adlewyrchu'r newidiadau cyfreithiol a ddaw yn sgil ymadael â'r UE. Credwn mai gwneud y gwelliannau hyn yw'r ffordd fwyaf diogel o symud ymlaen, felly anogaf yr Aelodau i gefnogi'r gwelliannau.

A, gan fy mod ar fy nhraed, hoffwn, os caf, gyda'ch caniatâd, Dirprwy Lywydd, ddiolch i'r Aelodau am eu gwaith yma heddiw a'r ystyriaeth ofalus a manwl a roddwyd i'r gwelliannau a gyflwynwyd a gwaith y ddau bwyllgor ar y Bil hwn.