Fel y nodwyd ar yr agenda, cynhelir y pleidleisiau heddiw yn unol â Rheol Sefydlog 34.11. Caiff pob grŵp gwleidyddol enwebu un aelod o'r grŵp i gario'r un nifer o bleidleisiau ag sydd o aelodau o'r grŵp. Yn achos grŵp gwleidyddol sydd â swyddogaeth weithredol, gall yr enwebai gario'r un nifer o bleidleisiau ag sydd o aelodau o'r grŵp hwnnw, ynghyd ag unrhyw aelodau eraill o'r Llywodraeth. Bydd Aelodau nad ydyn nhw'n perthyn i grŵp yn pleidleisio ar eu rhan eu hunain. Byddaf yn cynnal y bleidlais drwy alw'r gofrestr, ac felly, gan fod y Cynulliad wedi cytuno i grwpio'r cynigion ar y ddau reoliad o dan eitemau 6 a 7 ar yr agenda, un bleidlais yn unig a fydd. Galwaf felly am bleidlais ar y cynigion a gyflwynwyd yn enw Rebecca Evans, ac ar ran y grŵp Llafur a'r Llywodraeth gofynnaf i Vikki Howells: sut ydych chi'n bwrw eich 30 pleidlais?

O blaid.

Ar ran grŵp Ceidwadwyr Cymru, Angela Burns, sut ydych chi'n bwrw eich 11 pleidlais?

O blaid.

Ar ran Plaid Cymru, Siân Gwenllian, sut ydych chi'n bwrw eich naw pleidlais?

O blaid. 

Ar ran Plaid Brexit, Mark Reckless, sut ydych chi'n bwrw eich pedair pleidlais?

Yn erbyn.

Gareth Bennett, sut ydych chi'n bwrw eich pleidlais? Rwy'n credu mai yn erbyn oedd hynna, er na chlywyd hynny'n glir.

Yn erbyn oedd ef.

Ie, yn erbyn. Diolch, Gareth Bennett. Neil Hamilton, sut ydych chi'n bwrw eich pleidlais? Eto rwyf yn meddwl mai yn erbyn oedd hynna.

Yn erbyn.

Yn erbyn. A Neil McEvoy, sut ydych chi'n bwrw eich pleidlais?

O blaid.

Rwy'n credu mai o blaid oedd hynna, roeddwn i'n darllen gwefusau yn y fan yna am eiliad.

Ie, dyna oedd ef.

O blaid. Canlyniad y bleidlais, felly, yw—fe edrychaf ar fy ngrŵp WhatsApp yn gyflym—o blaid 51, neb yn ymatal a chwech yn erbyn. Ac felly, derbyniwyd y cynigion.

Cynhaliwyd y bleidlais ar NDM7319 a NDM7320 yn unol â Rheol Sefydlog 34.11.

Vikki Howells ar ran Grŵp Llafur a’r Llywodraeth: O blaid (30)

Angela Burns ar ran Grŵp y Ceidwadwyr: O blaid (11)

Siân Gwenllian ar ran Grŵp Plaid Cymru: O blaid (9)

Mark Reckless ar ran Grŵp Plaid Brexit: Yn erbyn (4)

Gareth Bennett – Annibynnol: Yn erbyn

Neil Hamilton – Plaid Annibyniaeth y Deyrnas Unedig: Yn erbyn

Neil McEvoy – Welsh National Party: O blaid

Derbyniwyd y cynigion.

Daw hynny â thrafodion heddiw i ben. Efallai yr hoffai'r Aelodau fod yn ymwybodol mai dyma cyfarfod rhif un fil tri chant a saith deg wyth a chyfarfod olaf Cynulliad Cenedlaethol Cymru. Yn unol â Deddf y Senedd ac Etholiadau (Cymru) 2020, byddwn yn ailymgynnull yr wythnos nesaf fel y Senedd, Senedd Cymru, the Welsh Parliament.

Prynhawn da i chi gyd. 

Daeth y cyfarfod i ben am 18:20.