Mi fydd Plaid Cymru yn cefnogi'r Bil yma y prynhawn yma. Mae ymrwymiad wedi bod gan Blaid Cymru, wrth gwrs, i ddeddfu ar y mater yma ers nifer o flynyddoedd ac mae'n dda gweld y bydd hynny yn cael ei wireddu heddiw.

Mi wnaf innau hefyd ategu'r diolchiadau i bawb sydd wedi chwarae eu rhan, drwy'r pwyllgor yn enwedig, i sicrhau bod y Bil yn cyrraedd y llyfr statud, gobeithio, mewn ychydig o amser. Yr unig beth sydd yn gadael blas cas yn y geg, efallai, yw'r ffaith ei bod hi wedi cymryd cyhyd i gyrraedd fan hyn. Mi oedd yna ddatganiad o farn nôl yn 2006—efallai y bydd rhai Aelodau a oedd yma ar y pryd yn cofio hynny—ac mi gymerodd hi wedyn tan 2015 i Lywodraeth Cymru gytuno nad oes lle i'r defnydd o anifeiliaid gwyllt mewn syrcasau. Mi oedd Cymru ar flaen y gad bryd hynny, ond ers hynny, fel rŷn ni wedi clywed, mae'r arafwch wedi golygu bod yr Alban wedi deddfu, Gweriniaeth Iwerddon wedi deddfu, Lloegr wedi deddfu, a heddiw, wrth gwrs, rŷn ni ar ei hôl hi, ond yn cyrraedd y pwynt lle rŷn ni'n deddfu, oherwydd wrth gwrs mae yna risg y byddai Cymru wedi dod yn rhyw fath o hafan i syrcasau sydd am ddefnyddio anifeiliaid gwyllt ym Mhrydain petaem ni ddim yn cymryd y cam yma y prynhawn yma.

Nawr, mae sgôp y Ddeddf yn fwy cyfyng na buaswn i'n ei ddymuno, wrth gwrs. Mae'n ffocysu yn unig ar wahardd perfformio ac arddangos anifeiliaid. Mi drion ni ei hehangu i gynnwys gwahardd anifeiliaid gwyllt rhag teithio gyda syrcasau, ac mi fyddai hynny wedi bod yn fwy triw i'r datganiad o farn y gwnes i gyfeirio ato fe nôl yn 2006, a oedd yn dweud, a dwi'n dyfynnu,

'nad yw natur dros dro'r cludiant, y llety na’r cyfleusterau ymarfer yn gallu darparu’r lle a’r cyfoethogiad sydd ei angen ar yr anifeiliaid hyn.'

Mae hynny yn parhau'n wir, ac mi fydd e'n medru parhau hyd yn oed ar ôl pasio'r Ddeddf yma, ond mae'r Ddeddf sydd ger ein bron ni yn well na pheidio â chael unrhyw Ddeddf o gwbl yn y cyd-destun hwn.

Mae'n glir, fel rŷn ni wedi clywed, fod y cyhoedd eisiau deddfu, mae Plaid Cymru yn awyddus i ddeddfu, a gobeithio y bydd y Senedd yma o'r diwedd hefyd yn deddfu er mwyn gwahardd y defnydd o anifeiliaid gwyllt mewn syrcasau teithiol yma yng Nghymru.