Mae'n galonogol iawn gweld cymaint o bobl ifanc eisiau cymryd rhan yn Senedd Ieuenctid Cymru, ac mae'n amlwg bod diddordeb mawr gyda nhw mewn nifer o faterion fel yr argyfwng hinsawdd a materion cyfiawnder cymdeithasol. Braidd yn siomedig oedd y nifer wnaeth gofrestru i bleidleisio rhwng 16 a 17 oed, ac anghyson iawn oedd y niferoedd. Er enghraifft, roedd Caerdydd o dan y 35 y cant tra—dwi'n siŵr y byddwch chi'n falch i glywed hyn, Llywydd—roedd Ceredigion ymhlith yr uchaf yn 63 y cant. Ond pa waith mae'r Comisiwn yn ei wneud, efallai, i dargedu'r awdurdodau lleol yna ble doedd dim cofrestru uchel iawn ymysg pobl ifanc er mwyn sicrhau bod y bobl ifanc yma yn teimlo'n rhan o ddemocratiaeth Cymru ac yn cofrestru ar gyfer yr etholiadau lleol ac etholiadau Senedd nesaf?