Eleni, ym mlwyddyn fy Jiwbilî Platinwm, mae wedi rhoi pleser o’r mwyaf i mi adnewyddu'r addewid a wnaed gennyf ym 1947, sef y byddaf yn ymroi fy mywyd mewn gwasanaeth.

Heddiw, mae’n bleser gweld Cymanwlad fodern, fywiog a chysylltiedig sy’n cyfuno cyfoeth o hanes a thraddodiad â datblygiadau cymdeithasol, diwylliannol a thechnolegol mawr ein hoes. Mae'r ffaith bod y Gymanwlad yn sefyll yn dalach fyth yn glod i bawb sydd wedi bod yn gysylltiedig â hi.

Cawn ein maethu a’n cynnal gan ein perthnasoedd a, thrwy gydol fy mywyd, rwyf wedi mwynhau’r fraint o glywed beth mae’r perthnasoedd a ffurfiwyd ledled y Gymanwlad, yn ei holl amrywiaeth, wedi’u golygu i bobl a chymunedau.

Mae ein teulu o genhedloedd yn parhau i fod yn bwynt o gysylltiad, cydweithrediad a chyfeillgarwch. Mae'n lle i ddod at ei gilydd i fynd ar drywydd nodau cyffredin a llesiant cyffredin, gan roi cyfle i bawb wasanaethu a chael budd. Yn y cyfnod anodd hwn, fy ngobaith yw y gallwch gael nerth ac ysbrydoliaeth o’r hyn rydym yn ei rannu, wrth inni weithio gyda’n gilydd tuag at ddyfodol iach, cynaliadwy a llewyrchus i bawb.

Ac ar y diwrnod arbennig hwn i'n teulu—yn ystod blwyddyn a fydd yn cynnwys Cyfarfod Penaethiaid Llywodraethau'r Gymanwlad a Gemau'r Gymanwlad—rwy'n gobeithio y gallwn gadarnhau eto ein penderfyniad i gefnogi a gwasanaethu ein gilydd, ac ymdrechu i sicrhau bod y Gymanwlad yn parhau i fod yn rym dylanwadol er daioni yn ein byd am genedlaethau lawer i ddod.