Diolch, Llywydd. Ni allaf gefnogi gwelliant 101, gan ei fod yn ddiangen, mewn gwirionedd. Fel y nodir yn adran 6 o Ddeddf Deddfwriaeth (Cymru) 2019, mae geiriau ac ymadroddion a restrir yn y tabl yn Atodlen 1 i'r Ddeddf honno i'w dehongli yn unol â'r tabl hwnnw, pan fyddan nhw'n ymddangos mewn Deddf Senedd Cymru. Diffinnir 'Ysgrifennydd Gwladol' yn y tabl fel 'un o Brif Ysgrifenyddion Gwladol Ei Mawrhydi' ac felly byddai'n cynnwys unrhyw un o'r Ysgrifenyddion Gwladol.

Ni allaf ychwaith gefnogi gwelliant 102, gan ei fod yn ehangu'r rhestr o unigolion a all rannu gwybodaeth â'r comisiwn i gynnwys unrhyw unigolyn arall y mae'r comisiwn yn ei ystyried yn briodol neu a allai gadw gwybodaeth am unrhyw fater y mae gan y comisiwn swyddogaeth mewn cysylltiad ag ef. Mae'r rhestr o unigolion yn adran 130 wedi'i datblygu er mwyn bod yn briodol eang i gynnwys pawb y gallai fod angen iddyn nhw rannu gwybodaeth â'r comisiwn. Hefyd, caiff Gweinidogion Cymru ychwanegu unigolion eraill at y rhestr drwy reoliadau. Bydd y dull hwn yn galluogi pobl i gael eu hychwanegu at y rhestr mewn modd rheoledig yn dilyn yr ymgynghoriad angenrheidiol a chraffu priodol gan y Senedd. Felly, galwaf ar Aelodau i wrthod y gwelliannau hyn.