Grŵp 11 yw'r grŵp olaf o welliannau, ac mae'r grŵp yma ar welliannau sy'n ymwneud â chofrestr gontractau. Gwelliant 10 yw'r prif welliant yn y grŵp, ac fe wnaf i ofyn i Peredur Owen Griffiths i gynnig y gwelliant yma.

Cynigiwyd gwelliant 10 (Peredur Owen Griffiths).

Diben gwelliannau 10 ac 11 yw diwygio adran 40, sy'n nodi'r wybodaeth y mae'n rhaid i awdurdodau contractio ei chynnwys yn eu cofrestr gontractau. Effaith y gwelliannau hyn, eto, fel y soniais eisoes o ran y rhai a gyflwynwyd ynghylch adran 27, yw diogelu adran 40 at y dyfodol drwy ychwanegu grym gwneud rheoliadau tebyg a fydd yn galluogi Gweinidogion i ddiwygio'r rhestr o ofynion pe bai angen. Yn ogystal â'r data sy'n cael eu casglu o ganlyniad i'r gwelliant a gytunwyd yn y grŵp blaenorol ar adroddiadau caffael cymdeithasol gyfrifol blynyddol, rydym ni'n rhagweld y dylid defnyddio'r gofrestr gontractau, er mai ei phrif ddiben yw tryloywder, i ofyn am ddata ychwanegol gan gyflenwyr. Dywedwch pe bai'n dod i'r amlwg i Weinidog yn y dyfodol mewn Llywodraeth yn y dyfodol bod angen data penodol i fwrw ymlaen ymhellach â'n huchelgeisiau i gefnogi'r gwerth sy'n cael ei ychwanegu at economi Cymru o gaffael, yna gellid gwneud y ddadl honno i'r Senedd. Fel gyda llawer o'r gwelliannau yr wyf i wedi eu cyflwyno heddiw, mae hwn yn ymwneud â sicrhau bod y ddeddfwriaeth hon yn addas i'r diben y tu hwnt i flwyddyn neu ddwy gyntaf ei hoes. Rwy'n gobeithio mai dyma farn y rhan fwyaf ohonom ni heddiw. Diolch yn fawr.

Y Dirprwy Weinidog i gyfrannu i'r ddadl. Hannah Blythyn.

Diolch, Llywydd. Gan mai hwn yw'r grŵp olaf o welliannau, hoffwn fanteisio ar y cyfle hwn i ddiolch ar goedd i Peredur Owen Griffiths a'r tîm am y ffordd yr ydym ni wedi gallu cydweithio, a'r ysbryd yr ydym ni wedi gallu cydweithio ynddo, ac i chwilio am atebion mewn partneriaeth wrth ddatblygu'r ddeddfwriaeth hon. Er fy mod i hefyd yn synnu bod Joel James wedi mwynhau'r profiad, rwy'n falch ei fod serch hynny.

Mae'r Llywodraeth yn hapus i gefnogi gwelliant a fyddai'n caniatáu i ofynion y gofrestr contractau caffael gael eu diwygio yn y dyfodol. Felly, rwy'n cytuno ag awgrym Peredur y byddai grym gwneud rheoliadau o'r math hwn yn ddefnyddiol o ran diogelu'r gofynion cofrestr contractau caffael at y dyfodol fel y gallwn ni ychwanegu at y rhain yn y dyfodol, pe bai angen. Ar y sail honno, bydd y Llywodraeth yn cefnogi gwelliannau 10 ac 11.

 Peredur Owen Griffiths.

Diolch yn fawr. Ac i gloi fy nghyfraniad olaf yn nadl olaf hon trafodion Cyfnod 3, hoffwn fanteisio ar y cyfle i ddiolch i bawb sydd wedi cynorthwyo gyda'r broses graffu: clercod y Senedd, cyfreithwyr, a thîm Plaid, a hoffwn dalu teyrnged hefyd i'r ffordd y mae'r Gweinidog a'i swyddogion wedi mynd i'r afael â'r broses graffu, ac rwy'n gobeithio y bydd hi'n teimlo'n well yn fuan. Mae'n drueni nad oedd hi yn y Siambr yma, ond rwy'n falch iddi allu cymryd rhan yn y ddadl hon.

Dydyn ni ddim wedi cytuno ar bopeth, ac ni ddylem ni chwaith, ond bydd y ddeddfwriaeth derfynol hon sy'n deillio o Gyfnod 3 yn cynrychioli cyfaddawd gwirioneddol sydd wedi cael ei wella'n enfawr o ganlyniad i'r dull hwn. Mae'n briodol nawr ein bod ni wedi ymdrin â'r ddeddfwriaeth hon am bartneriaeth gymdeithasol yn y ffordd honno a'i bod wedi cael ei thrafod yn yr union ysbryd hwnnw.

O ran cynnwys y ddeddfwriaeth, mae'n arwyddocaol bod y Senedd hon, wrth gytuno i'r gwelliannau yng Nghyfnod 3 heddiw, wedi cymryd cam pendant arall o blaid y ffordd Gymreig o ddadwneud Thatcheriaeth a rhoi fframwaith caffael ar waith sy'n gatalydd ar gyfer ailddosbarthu, gan leihau rhoi contractau allanol i ddarparwyr sector preifat rhatach a darparu dull wedi'i ysgogi gan werth, prynu gan gyflenwyr yng Nghymru sy'n talu cyflogau da ac yn parchu a hyrwyddo ein gwerthoedd yn y ffordd y maen nhw'n cyflawni eu gweithgareddau, o weithio gyda'n hundebau llafur a'n gweithwyr, a chyfyngu ar eu hawliau, nid eu cymryd i ffwrdd—a pharchu eu hawliau, nid eu cymryd i ffwrdd. Mae'n ddrwg gen i; mae hi wedi bod yn sesiwn hir. [Chwerthin.]

Mae hyn yn cynrychioli'r ddau ddewis am ddyfodol Cymru: datblygu Cymru fel cenedl i'n gweithwyr a'n busnesau lleol, neu ddarostwng ein hunain i'r tactegau rhannu a rheoli a llai o hawliau ac amddiffyniadau o dan oruchwyliaeth San Steffan, gan godi rhwystrau i streicio, protestio, a hyd yn oed pleidleisio. Mae'r ddeddfwriaeth hon yn gymeradwyaeth o'r ffordd gyntaf. Diolchaf i'r Gweinidog am gadarnhau y bydd y Llywodraeth yn cefnogi ein gwelliannau.

Llywydd, gawn ni symud ymlaen i'r pleidleisiau olaf heno? Diolch.

Y cwestiwn yw: a ddylid derbyn gwelliant 10? A oes unrhyw wrthwynebiad? Nac oes. [Gwrthwynebiad.] [Torri ar draws.]

Roedd hynna'n agos.

Mi wnawn ni symud i bleidlais, felly, ar welliant 10, gan fod yna wrthwynebiad. Agor y bleidlais. Cau'r bleidlais. O blaid 41, 14 yn ymatal, un yn erbyn. Ac felly, mae gwelliant 10 wedi ei dderbyn.

Gwelliant 10: O blaid: 41, Yn erbyn: 1, Ymatal: 14

Derbyniwyd y gwelliant

Gwelliant 11 sydd nesaf. Ydy e'n cael ei symud gan Peredur Owen Griffiths?

Cynigiwyd gwelliant 11 (Peredur Owen Griffiths).

Ydy.

Ydy. Oes gwrthwynebiad i welliant 11? Nac oes, dim gwrthwynebiad i welliant 11.

Derbyniwyd y gwelliant yn unol â Rheol Sefydlog 12.36.

Gwelliant 12 yw'r un olaf. Peredur Owen Griffiths, yn cael ei symud?

Cynigiwyd gwelliant 12 (Peredur Owen Griffiths).

Ydy.

Oes gwrthwynebiad? [Gwrthwynebiad.] Oes, mae yna wrthwynebiad. Felly mi gymrwn ni bleidlais ar welliant 12. Agor y bleidlais. Cau'r bleidlais. O blaid 40, ymatal 15, un yn erbyn. Felly mae gwelliant 12 wedi ei dderbyn.

Gwelliant 12: O blaid: 40, Yn erbyn: 1, Ymatal: 15

Derbyniwyd y gwelliant

Rydym felly wedi dod i ddiwedd ystyriaeth Cyfnod 3 o'r Bil Partneriaeth Gymdeithasol a Chaffael Cyhoeddus (Cymru), a dwi'n datgan y bernir bod pob adran o'r Bil a phob Atodlen iddo wedi eu derbyn.

Barnwyd y cytunwyd ar bob adran o’r Bil.

Ac os caf i wneud y sylw terfynol i'r Dirprwy Weinidog: rwy'n gobeithio y gwnewch chi wella o'ch salwch. Ond hefyd, a gaf i ddweud am wal fendigedig yw honna fel cefndir? [Chwerthin.]  

Dyna ddiwedd ar ein trafodion am heddiw.

Daeth y cyfarfod i ben am 19:04.