Diolch i chi am y gyfres o gwestiynau. Efallai y gallaf ddechrau gyda’r diwedd, dim ond i ddelio â hynny yn gyflym. Mae'n £1 miliwn ar gyfer pob un o'r prif gynlluniau cyflwr, ac mae sut y caiff yr arian hwnnw ei ddefnyddio yn cael ei benderfynu gan y grŵp gweithredu. Felly, mae amrywiaeth o bobl o'r gwasanaeth iechyd yn ymwneud â hynny. Yn aml, cyfarwyddwr meddygol neu brif weithredwr bwrdd iechyd lleol neu ymddiriedolaeth sy'n cadeirio’r cyrff hynny, ond maent yn cynnwys amrywiaeth o wahanol bobl o wahanol rannau o'r gwasanaeth iechyd a'r trydydd sector, sydd, fel y dywedais yn gynharach, yn gryfder pwysig. Byddant wedyn yn penderfynu ar nifer penodol o flaenoriaethau a beth i'w roi i mewn i bob maes. Felly, nid yw'r Llywodraeth yn dweud wrthynt, 'Dyma beth sy'n rhaid i chi ei wneud gyda'r arian hwn.' Mae’n fater i’r grŵp hwnnw benderfynu, 'Beth allwn ni ei wneud gyda’r swm hwn o arian i wella'r maes gwasanaeth hwn, a beth yr ydym ni'n credu yw'r blaenoriaethau go iawn o fewn hynny?' Mae hynny wedi’i groesawu mewn gwirionedd gan bobl yn y gwasanaeth a'r tu allan —y lobi, y grwpiau diddordeb a thrydydd sector: cael swm o arian i wneud gwahaniaeth go iawn.

Fel y dywedais yn gynharach, yn fy natganiad, am y cynlluniau hynny, mae hyn yn mynd yn ôl at eich pwynt ynghylch faint sy'n cael ei rannu, oherwydd fy mod i mewn gwirionedd wedi fy nghalonogi gan faint o waith ar y cyd sydd wedi digwydd yn eithaf cyflym ers i’r arian fod yno—felly, mae'r pwyntiau a wneuthum ynghylch y meysydd o waith ar y cyd rhwng cyflyrau niwrolegol a strôc, a’r pwynt am asesu risg cardiofasgwlaidd, ar waith a rennir yno hefyd. Felly, rydym wir wedi gweld pobl yn dod at ei gilydd i siarad â'i gilydd am sut i ddefnyddio eu harian mewn ffordd gydgysylltiedig, ac mae hynny'n wirioneddol galonogol. Mae hefyd wedi dwyn ynghyd ystod o wahanol bobl yn y trydydd sector mewn cynghreiriau newydd hefyd. Er enghraifft, ceir cynghrair cardiofasgwlaidd newydd rhwng amrywiaeth o wahanol elusennau sy’n ymwneud ag ac yn cymryd rhan yn yr un math o faes gwaith, ac mae hynny'n wirioneddol galonogol i ni. Mae'n golygu, mwy na thebyg, bod ganddynt fwy o lais o ganlyniad, ond mae hefyd yn fwy defnyddiol i'r Llywodraeth ymgysylltu â hwy fel grŵp, sy’n dod at ei gilydd â blaenoriaethau unedig. Felly, rwy’n meddwl bod hynny wedi bod yn galonogol iawn hefyd.

Ond mae'r gwaith yn dal yn gymharol newydd, felly mae'r pwynt ynghylch deall yr hyn y maent am ei wneud, sut y maent yn hysbysu eu hunain am flaenoriaethau, bwrw ati a chyflawni, a bod yn gallu gwerthuso hynny, mewn gwirionedd yn dal i fod ar y gweill, felly ni fyddwn yn gallu gwerthuso pa effaith y mae wedi'i chael tan rywbryd yn ddiweddarach yn ystod y flwyddyn. Ond, wrth ddyrannu’r arian hwnnw, mae’n rhaid inni dderbyn, wrth wneud hynny, efallai na fydd yr arian bob amser yn esgor ar y canlyniadau dymunol yr ydym eisiau iddo eu cynhyrchu. Ond, rwy’n credu y byddwn yn gweld cynnydd go iawn yn cael ei wneud o ran amrywiaeth ohonynt, ac rwy’n meddwl efallai mai’r enghraifft orau o hynny yw'r gardioleg gymunedol, a gyflwynwyd i ddechrau yn Abertawe Bro Morgannwg, yn ardal Abertawe, ac sydd erbyn hyn yn cael ei chyflwyno ar draws y wlad. Oherwydd mae tystiolaeth wirioneddol bod budd gwirioneddol i’r claf o symud gwasanaethau i'r gymuned, ac i'r dinesydd hefyd, ac mae mewn gwirionedd yn buddsoddi mewn gofal sylfaenol yn hynny o beth hefyd. Mae gofal eilaidd ar gyfer hyn wedi bod yn gadarnhaol iawn yn ardal Abertawe, gan eu bod yn cydnabod ei fod wir wedi symud pobl yn eu hardal i fannau lle y gallant gael eu gweld, mae wedi rhyddhau pwysau arnynt, mae'r amseroedd aros bellach yn lleihau yn y maes gofal eilaidd o ganlyniad, ac mae meddygon ymgynghorol gweld pobl y maent yn cydnabod y mae gwir angen iddynt eu gweld. Felly, mae'n enghraifft dda iawn o'r cynnydd yr ydym yn awyddus i’w wneud.

Ac rwy’n meddwl y byddaf yn ceisio delio â'ch pwyntiau yn awr ynghylch cyd-gynhyrchu ac integreiddio, oherwydd mae’n ymwneud â mwy na dim ond y trydydd sector, mae'n ymwneud â'r dinesydd, sy'n rhan o'r uchelgais ar gyfer dyfodol gofal iechyd yng Nghymru, nid dim ond yn y cynlluniau cyflawni. Mae'n ymwneud â sicrhau bod y berthynas rhwng y dinesydd a'r gweithiwr iechyd proffesiynol wedi newid, mae’n ymwneud â gwneud yn siŵr bod y trafodaethau hefyd yn cael eu hategu gan integreiddio gwasanaethau yn ehangach hefyd—felly, y newid rhwng gofal sylfaenol ac eilaidd yr ydym wedi siarad amdano ers sefydlu’r lle hwn—ac mae’n ymwneud â sicrhau bod mwy o dystiolaeth bod hynny'n digwydd, gyda chardioleg gymunedol yn un enghraifft o faes lle y mae wedi digwydd. Ond, yr un modd, integreiddio â meysydd eraill o wasanaeth hefyd, felly nid gofal sylfaenol ac eilaidd yn unig, nid gwasanaethau cymdeithasol yn unig, ond integreiddio â chydweithwyr mewn adrannau addysg a thai hefyd, a chydnabod y rhan sydd gan hyn i'w chwarae wrth wella ystod o wahanol feysydd. Ac rwy’n meddwl efallai, o ran adsefydlu, mae’n enghraifft dda iawn o’r swyddogaeth bwysig sydd gan tai hefyd, wrth gael pobl i mewn i’w cartrefi eu hunain yn gyflymach, a beth y mae hynny'n ei olygu wedyn ar gyfer uno gwahanol wasanaethau, ac mewn gwirionedd y gwahanol weithwyr proffesiynol y mae angen iddynt ymgysylltu â hynny. Mae hynny'n bwysig iawn, er enghraifft, gyda gofal strôc, wrth symud ymlaen, yn fersiwn nesaf y cynllun, a deall y cyngor a'r canllawiau wedi’u diweddaru a gynhyrchwyd gan Goleg Brenhinol y Meddygon, sy’n rhoi pwyslais trwm ar gael pobl i mewn i'w cartref eu hunain yn fwy cyflym er mwyn i’r broses adsefydlu gael dechrau. Felly, mae sbardunau pwysig iawn ar waith y mae angen i bob grŵp gweithredu eu hystyried.

Felly, rwyf yn dymuno gorffen drwy ddweud, o ran y pwyntiau a wnewch am ganlyniadau, recriwtio a materion sy’n ymwneud â’r gweithlu, yn sicr rydym yn cydnabod bod pob un o'r cynlluniau cyflawni wedi bod yn ddefnyddiol yn y modd hwn, wrth amlygu meysydd lle y mae angen gwneud yn well, lle y mae diffyg go iawn, lle y mae tystiolaeth am yr hyn y mae hynny'n ei olygu, ac am sut y bydd y gwelliannau’n edrych hefyd. Felly, amser cinio, roeddwn yn gallu nodi bod cael tîm amlddisgyblaethol yn trin clefyd interstitaidd yr ysgyfaint yn gadarnhaol iawn o ran lleihau amseroedd aros i bobl, o rywbeth fel 18 wythnos i lawr at bythefnos. Mae hynny’n cael ei ysgogi gan y ffordd y mae'r grŵp gweithredu wedi gweithio gyda'i gilydd, felly ceir profiad gwell, ac erbyn hyn ceir canlyniadau gwell i bobl hefyd. Felly, mae rhesymau da dros fod yn gadarnhaol, yn ogystal â dros ddweud na ddylem fod yn hunanfodlon. Mewn gwirionedd, mae'r dull hwn yn golygu na ddylem fod yn hunanfodlon gan fod gennym ystod o wahanol bobl sy'n ymwneud ac yn cymryd rhan yn y gwaith sydd ar y gweill gennym.