Wel, rwy’n croesawu hynny yn fawr iawn, a dweud y gwir. Os ydy’r lle yma yn gallu siarad gydag un llais, rwy’n gobeithio’n wir y bydd y llais hwnnw’n cael ei glywed lawr yng nghoridorau Whitehall a San Steffan.

Yn olaf, ac i’r un perwyl, a dweud y gwir, rwy’n gobeithio y bydd cefnogaeth yn dod i hwn hefyd. Mae angen symud ymlaen, onid oes, gyda’r cyfle euraidd yma sydd gennym gyda’r morlyn morlanw—dyna y mae Dai Lloyd yn mynnu yw’r term Cymraeg ar gyfer ‘tidal lagoon’. Nid wyf yn siŵr a yw’n trio awgrymu rhywbeth sydd ddim cweit yn gwbl glir, ond rwy’n licio’r cyflythreniad, beth bynnag; mae hi bron yn gynganeddol. Mae’n rheswm arall dros gefnogi’r peth, a dweud y gwir. Mae Charles Hendry wedi cyflwyno ei adroddiad erbyn hyn i’r Ysgrifennydd Gwladol, felly mae’n rhaid nawr, rwy’n credu, inni symud ymlaen a gweld cyfle i Gymru gydio yn y cyfle yma.

Mae yna rai pethau yn y datganiad roeddwn i’n eu croesawu, a dweud y gwir: arian ychwanegol ar gyfer arloesedd, sydd wedi cael ei grybwyll gan yr Aelod sy’n llefaru ar ran y Torïaid—y cynnydd mwyaf, a bod yn gywir, mewn arian ar gyfer arloesedd ers 1979. Felly, mae yna £4.7 biliwn yn ychwanegol dros y cyfnod yma, a £2 biliwn yn ychwanegol erbyn 2020. Mae’n rhaid inni wneud yn siwr bod Cymru yn elwa ar y cyfle yma. Mae yna sôn am greu DARPA, sef y corff yn America a oedd wedi, wrth gwrs, arwain yn rhannol at Tim Berners-Lee yn dyfeisio’r we. Wel, beth am leoli’r corff hwnnw a fydd yn rhedeg y gronfa newydd ar gyfer heriau diwydiannol nid yn y de-ddwyrain o fewn y Deyrnas Gyfunol, ond fan hyn, yma yng Nghymru?