Diolch i chi, Dirprwy Lywydd. Mae gwelliannau 21 a 22 yn welliannau sylweddol yn y grŵp hwn ac maent yn diwygio adrannau 38 a 39 o'r Bil.

Mae gwelliant 21 yn ceisio diwygio adran 38. Mae Adran 38 o'r Bil yn gwneud darpariaeth ar gyfer cyfnodau cyfrifo sy'n berthnasol i weithredwyr cofrestredig ac anghofrestredig safleoedd tirlenwi awdurdodedig. Rydym wedi dod i'r farn nad yw'r ddarpariaeth bresennol yn ymdrin yn llawn â’r amgylchiadau hynny lle mae gweithredwr anghofrestredig sydd wedi cynnal gweithrediadau trethadwy, yn cael eu cofrestru wedyn. Fel y mae wedi’i ddrafftio ar hyn o bryd, efallai y bydd y Bil yn cael yr effaith annymunol o'i gwneud yn ofynnol i'r gweithredwr cofrestredig roi cyfrif ar gyfer gwarediadau y maent eisoes wedi eu cyfrif pan oeddent yn anghofrestredig. Mae gwelliant 21 y Llywodraeth yn egluro’r sefyllfa honno drwy sicrhau, pan fo gweithredwyr anghofrestredig wedyn yn cael eu cofrestru, na fydd yn rhaid iddynt roi cyfrif am unrhyw warediadau trethadwy y maent eisoes wedi’u cyfrif pan oeddent heb eu cofrestru. Mae'r gwelliant hwn hefyd yn egluro dyddiad ffeilio a chyfnodau cyfrifyddu sy'n berthnasol pan fo Awdurdod Refeniw Cymru wedi amrywio’r dyddiadau neu'r cyfnodau dan adran 39 y Bil.

O ganlyniad i roi ystyriaeth i adrannau 38 a 39, rydym hefyd yn ceisio cael gwared ar adran 39 (3) (b) o'r Bil i sicrhau bod Awdurdod Cyllid Cymru yn gallu cyhoeddi hysbysiad amrywio o ran dyddiadau ffeilio yn gyffredinol a chyflawnir hyn drwy welliant 22.

Mae’r gwelliannau eraill yn y grŵp—gwelliannau 33, 34 a 37—i gyd yn ganlyniadol ar welliant 21 ac yn gwneud gwelliannau i adran 94 ac Atodlen 4 y Bil. Yn ystod Cyfnod 2, o ganlyniad i argymhellion y Pwyllgor Cyllid ac ymgysylltu parhaus gydag arbenigwyr ac ymarferwyr yn y maes arbenigol iawn hwn, cyflwynwyd nifer o welliannau Llywodraeth i gryfhau'r tegwch i'r trethdalwr yn y defnydd ymarferol o dreth gwarediadau tirlenwi. Mae'r gwelliannau yn grŵp 6 yn ymdrechion pellach i gyflawni'r un canlyniad a gofynnaf i’r Aelodau eu cefnogi.