Diolch. Roedd hwn, mewn sawl ffordd, yn welliant treiddgar. Cawsom y drafodaeth hon, fel y dywedasoch, yng Nghyfnod 2, Ysgrifennydd y Cabinet. Roedd i gyd yn rhan o'r drafodaeth ynghylch pa mor annibynnol yw Awdurdod Cyllid Cymru, faint o gorff hyd braich fydd yr Awdurdod, neu i ba raddau y bydd yn cael ei reoli gan Lywodraeth Cymru. Fel yr wyf wedi dweud gyda’r gwelliant blaenorol a gyflwynwyd gan Steffan Lewis, nid wyf yn hollol siŵr ein bod yn dod i gasgliad boddhaol ynghylch lle mae’r cydbwysedd hwnnw rhwng cael eu harwain gan Lywodraeth Cymru a chaniatáu’r annibyniaeth neu’r ymreolaeth angenrheidiol hwnnw i Awdurdod Cyllid Cymru. Ond rwy’n cydnabod yr hyn a ddywedasoch am nad ydym am fod yn rhy llawdrwm gydag Awdurdod Cyllid Cymru, yn enwedig yn y cyfnod cynnar. Felly, os ydych yn barod i roi ymrwymiad pellach, wrth i Awdurdod Cyllid Cymru gael ei ddatblygu ac wrth i'r trethi newydd ddod ar-lein, y bydd Llywodraeth Cymru yn monitro'r sefyllfa i sicrhau bod hyn yn gweithio'n effeithiol, ac mae'n gwneud hynny yn absenoldeb canllawiau yr wyf yn deall eich rhesymau dros beidio â bod eisiau eu rhoi, yna dwi'n hapus i dynnu’r gwelliant hwn yn ôl, ond, fel y dywedais, rwy’n credu bod angen i ni gadw llygad ar hyn.