Felly, symudwn at eitem 6, sef Rheoliadau Iechyd Planhigion (Coedwigaeth) (Diwygiadau Amrywiol) (Cymru) (Ymadael â'r UE) 2020—[Torri ar draws.] Mae'n ddrwg gennyf, dyna sut y caiff ei ysgrifennu. A allaf nawr alw ar Weinidog yr Amgylchedd, Ynni a Materion Gwledig i wneud y cynnig? Lesley Griffiths.

Cynnig NDM7498 Rebecca Evans

Cynnig bod y Senedd, yn unol â Rheol Sefydlog 27.5:

1. Yn cymeradwyo bod y fersiwn ddrafft o Reoliadau Iechyd Planhigion (Coedwigaeth) (Diwygiadau Amrywiol) (Cymru) (Ymadael â’r UE) 2020 yn cael ei llunio yn unol â’r fersiwn ddrafft a osodwyd yn y Swyddfa Gyflwyno ar 17 Tachwedd 2020.

Cynigiwyd y cynnig.

Diolch, Dirprwy Lywydd, a chynigiaf y cynnig. Mae Rheoliadau Iechyd Planhigion (Coedwigaeth) (Diwygiadau Amrywiol) (Cymru) (Ymadael â'r UE) 2020 yn gwneud diwygiadau i Reoliadau Deunyddiau Atgenhedlol y Goedwig (Prydain Fawr) 2002 a Rheoliadau Iechyd Planhigion (Ffioedd) (Coedwigaeth) (Cymru) 2019, yn uniongyrchol a thrwy ddiwygiadau i Reoliadau Iechyd Planhigion (Coedwigaeth) (Diwygiadau Amrywiol) (Cymru) (Ymadael â'r UE) 2019.

Mae diwygiadau rheoliadau 2020 yn gweithredu penderfyniadau Prydain Fawr ar gyfatebiaeth deunydd atgenhedlol coedwigoedd a gynhyrchir mewn gwledydd y tu allan i Brydain Fawr ac yn nodi'r gofynion diwygiedig sy'n berthnasol yng Nghymru. Mae hyn yn angenrheidiol er mwyn cynnal safonau deunydd atgenhedlol coedwigoedd a fewnforiwyd a bioddiogelwch cysylltiedig. Mae angen y diwygiadau hyn i adlewyrchu sefyllfa Cymru o fewn Prydain Fawr ar ôl y cyfnod pontio yn sgil y DU yn ymadael â'r Undeb Ewropeaidd ac i sicrhau cysondeb â'r gyfraith yn Lloegr a'r Alban. Mae'r gwelliannau'n dechnegol eu natur heb unrhyw newidiadau i bolisi.

Daw rheoliadau 1, 2, 3 a 5 i rym yn union cyn diwrnod cwblhau'r cyfnod gweithredu y'i diffinnir yn adran 39 o Ddeddf yr Undeb Ewropeaidd (Cytundeb Ymadael) 2020 fel 11 p.m. ar 31 Rhagfyr 2020. Daw rheoliadau 4 a 6 i rym ar ddiwrnod cwblhau'r cyfnod gweithredu. Diolch.

Diolch. Nid oes gennyf siaradwyr ac nid oes gennyf neb sydd eisiau gwneud ymyriad. Felly, Gweinidog, nid wyf yn credu bod angen ateb, oherwydd nid ydym ni wedi cael y ddadl. Felly, y cynnig yw ein bod yn derbyn y cynnig. A oes unrhyw Aelod yn gwrthwynebu? Dydw i ddim yn gweld unrhyw wrthwynebiadau. Felly, derbynnir y cynnig yn unol â Rheol Sefydlog 12.36.

Derbyniwyd y cynnig yn unol â Rheol Sefydlog 12.36.