Dros yr wythnos nesaf, wrth i ni ddathlu cyfeillgarwch, undod a chyflawniadau'r Gymanwlad, dyma gyfle inni fyfyrio ar y cyfnod digynsail a fu.

Er bod ein profiadau ni oll dros y flwyddyn ddiwethaf wedi bod yn wahanol ar draws y Gymanwlad, gwelwyd enghreifftiau nodedig o ddewrder, ymrwymiad ac ymroddiad gwirioneddol i ddyletswydd ym mhob un o wledydd a thiriogaethau’r Gymanwlad – yn arbennig felly gan y rheiny a fu’n gweithio ar y rheng flaen yn sicrhau bod gofal iechyd a gwasanaethau cyhoeddus eraill ar gael yn eu cymunedau. Mae hefyd wedi bod yn galondid gweld y cynnydd rhyfeddol sydd wedi ei wneud wrth ddatblygu brechlynnau a thriniaethau newydd.

Wrth i gynifer o bobl wynebu cyfnod anodd tu hwnt, dyfnhau wnaeth ein gwerthfawrogiad o’r gefnogaeth a’r gynhaliaeth a gawsom, a hynny drwy ein perthnasoedd ag eraill.

I nifer o bobl ar draws y Gymanwlad, profiad anarferol oedd gorfod cadw pellter cymdeithasol a byw a gweithio ar wahân. Yn ein bywyd bob dydd, bu’n rhaid inni ddod i arfer â chysylltu a chyfathrebu â phobl drwy dechnoleg arloesol – ac mae hyn wedi bod yn brofiad newydd i nifer ohonom. Ar-lein y cynhaliwyd sgyrsiau a chyfarfodydd, gan gynnwys cyfarfodydd y Gymanwlad, a golygodd hyn y gallai pobl gysylltu â’u ffrindiau, eu teulu a’u cydweithwyr neu gymheiriaid nad oedd modd cwrdd â hwy yn y cnawd. Wrth i amser fynd rhagddo, rydym wedi mynd i fwynhau cyfathrebu fel hyn fwyfwy, gan iddo olygu y gallwn gysylltu â’n gilydd ar unwaith a goresgyn unrhyw rwystrau neu raniadau, ac mae hyn yn ei dro wedi lleddfu unrhyw deimlad o bellter.

Rydym oll wedi parhau i werthfawrogi’r gefnogaeth, y profiadau eang a’r wybodaeth a ddaw yn sgil gweithio gydag eraill, ac rwy’n mawr obeithio y gallwn gadw’r ymdeimlad newydd hwn o agosatrwydd a chymuned. Wrth edrych tua’r dyfodol, bydd perthnasoedd ag eraill ar draws y Gymanwlad yn parhau i fod yn bwysig wrth inni weithio i greu dyfodol sy’n gyffredin rhyngom ac sy’n gynaliadwy ac yn saffach. Gan hynny, gall y gwledydd a’r cymunedau yr ydym yn byw ynddynt, lle bynnag y bônt, fod yn iachach ac yn hapusach inni oll.