Eitem 20 ar ein hagenda y prynhawn yma yw Rheoliadau Dyrannu Tai a Digartrefedd (Cymhwystra) (Cymru) (Diwygio) 2021. Galwaf ar y Gweinidog Tai a Llywodraeth Leol i gynnig y cynnig. Julie James.

Cynnig NDM7641 Rebecca Evans

Cynnig bod y Senedd, yn unol â Rheol Sefydlog 27.5:

1. Yn cymeradwyo bod y fersiwn ddrafft o Reoliadau Dyrannu Tai a Digartrefedd (Cymhwystra) (Cymru) (Diwygio) 2021 yn cael ei llunio yn unol â’r fersiwn ddrafft a osodwyd yn y Swyddfa Gyflwyno ar 23 Chwefror 2021.

Cynigiwyd y cynnig.

Diolch, Dirprwy Lywydd. Mae Rheoliadau Dyrannu Tai a Digartrefedd (Cymhwystra) (Cymru) 2014, neu reoliadau 2014, yn ei gwneud yn bosibl i bersonau sy'n ddarostyngedig i reolaeth mewnfudo allu gwneud cais am lety tai ac am gymorth tai. Rydym wedi gwneud y Rheoliadau Dyrannu Tai a Digartrefedd (Cymhwystra) (Cymru) (Diwygio) 2021 drafft i ychwanegu dosbarth arall o bersonau, y rhai hynny sydd â chaniatâd di-wladwriaeth i aros yn y DU, i gael cymhwystra i gael llety a chymorth tai. Rwy'n gobeithio y bydd yr Aelodau yn croesawu'r gwelliant i reoliadau 2014, gan y bydd yn sicrhau bod deddfwriaeth tai yng Nghymru yn gyson â'r ymrwymiadau y mae'r Deyrnas Unedig wedi eu gwneud drwy gonfensiwn y Cenhedloedd Unedig yn 1954 sy'n ymwneud â statws personau di-wladwriaeth. Mae hyn yn ei gwneud yn ofynnol i lofnodwyr y confensiwn roi mynediad i bobl ddi-wladwriaeth at dai ar delerau nad ydynt yn llai ffafriol na'r rhai a roddir i estroniaid yn gyffredinol o dan yr un amgylchiadau—er enghraifft, pobl y caniatawyd lloches iddynt.

Gwnaed newidiadau tebyg yn ddiweddar ar draws gweddill y DU. Bydd y rheoliadau diwygiedig yn mynd i'r afael â'r sefyllfa hon o ran llety a chymorth tai ac yn dileu gwahaniaethu posibl. Nid wyf i'n disgwyl i'r gwelliannau arwain at gynnydd yn y galw am dai a chymorth tai; yng Nghymru, gallai fod ychydig iawn o alw, neu ddim o gwbl, am wasanaethau cyhoeddus, oherwydd natur anghyffredin y cyflwr o fod yn ddi-wladwriaeth. Fodd bynnag, dylai'r rhai sydd yn ddi-wladwriaeth, sy'n byw bywydau ansicr, wybod, os byddan nhw'n dod i Gymru a dewis ei gwneud yn gartref iddyn nhw, y byddan nhw'n ei chanfod yn lle croesawgar, lle gallant ddod o hyd i ddiogelwch am gyhyd ag y maen nhw'n dymuno aros. Bydd y rheoliadau drafft yn ein helpu i gyflawni'r nod hwn. Rwy'n gobeithio felly y bydd pob Aelod yn cefnogi'r cynnig ar gyfer y ddadl hon a'r rheoliadau.

Diolch. Nid oes gennyf siaradwyr ar gyfer y ddadl, felly y cynnig yw ein bod yn derbyn y cynnig. A oes unrhyw Aelod yn gwrthwynebu? Nac oes. Felly, yn unol â Rheol Sefydlog 12.36, derbynnir y cynnig.

Derbyniwyd y cynnig yn unol â Rheol Sefydlog 12.36.

Yn unol â Rheol Sefydlog 12.24, unwaith eto, oni bai bod Aelod yn gwrthwynebu, caiff y pedwar cynnig o dan eitemau 21 i eitem 24, rheoliadau'r amgylchedd a newid yn yr hinsawdd 2021, eu grwpio i'w trafod ond gyda phleidleisiau ar wahân. Nid wyf yn gweld unrhyw wrthwynebiadau i hynny. Nac oes.