Eitem 19 ar ein hagenda yw Gorchymyn Asesu Anghenion Llety Sipsiwn a Theithwyr (Ymestyn y Cyfnod Adolygu) (Cymru) (Coronafeirws) 2021, a galwaf ar y Dirprwy Weinidog a'r Prif Chwip i gynnig y cynnig. Jane Hutt.

Cynnig NDM7642 Rebecca Evans

Cynnig bod y Senedd, yn unol â Rheol Sefydlog 27.5:

1. Yn cymeradwyo bod y fersiwn ddrafft o Orchymyn yr Asesiad o Anghenion Llety Sipsiwn a Theithwyr (Estyn y Cyfnod Adolygu) (Cymru) (Coronafeirws) 2021 yn cael ei llunio yn unol â’r fersiwn ddrafft a osodwyd yn y Swyddfa Gyflwyno ar 23 Chwefror 2021.

Cynigiwyd y cynnig.

Diolch, Dirprwy Lywydd. Mae'r 12 mis diwethaf wedi bod yn eithriadol o heriol i wasanaethau cyhoeddus yng Nghymru, ac mae hefyd wedi eu hatal rhag bwrw ymlaen â rhywfaint o waith lle mae hyn yn gofyn am gyswllt wyneb yn wyneb â chymunedau. O dan adran 101 o Ddeddf Tai (Cymru) 2014, mae dyletswydd ar awdurdodau tai lleol i gwblhau asesiad llety Sipsiwn a Theithwyr, neu GTAA fel y'i gelwir. Ar gyfer y rhan fwyaf o awdurdodau, roedd yr asesiad hwn i fod i gael ei wneud ar 25 Chwefror 2021. Mae cyfyngiadau COVID wedi golygu nad yw awdurdodau tai lleol wedi gallu ymgymryd â gwaith ymgysylltu yn effeithiol, ac mae eu hasesiad llety Sipsiwn a Theithwyr yn dibynnu ar hynny. Mae'r Gorchymyn sy'n cael ei drafod heddiw yn rhoi 12 mis ychwanegol i awdurdodau tai lleol gwblhau eu hasesiadau llety Sipsiwn a Theithwyr.

Bydd y Gorchymyn drafft yn diwygio Deddf Tai (Cymru) 2014 i ymestyn y cyfnod adolygu presennol o bum mlynedd i chwe blynedd. Ar ôl hynny, bydd cyfnod yr adolygiad yn dychwelyd i gylch pum mlynedd. Bydd y cyfnod ymestyn yn caniatáu i awdurdodau tai lleol gynnal asesiad priodol o anghenion llety Sipsiwn a Theithwyr sy'n byw yn eu hardal, ac i wneud hynny mewn ffordd sydd fwyaf tebygol o arwain at ymgysylltu cryf â chymunedau. A'm gobaith i yw y byddwn, wrth ddarparu'r estyniad, yn caniatáu amser i awdurdodau lleol gynnal yr asesiad mwyaf cadarn o angen posibl fel bod anghenion llety Sipsiwn a Theithwyr ledled Cymru yn cael eu nodi a'u diwallu yn llwyr. A bydd hyn, yn ei dro, yn gwella canlyniadau i Sipsiwn a Theithwyr a hefyd yn gweithredu i leihau gwersylloedd diawdurdod. Felly, rwy'n ddiolchgar i awdurdodau tai lleol, grŵp rhanddeiliaid arbenigol Llywodraeth Cymru, a rhai aelodau o'r gymuned am eu cyngor a'u cefnogaeth ynghylch yr estyniad arfaethedig hwn. 

Galwaf ar Gadeirydd y Pwyllgor Deddfwriaeth, Cyfiawnder a'r Cyfansoddiad, Mick Antoniw.

Diolch unwaith eto, Dirprwy Lywydd. Fe wnaethom ni ystyried y Gorchymyn yn ein cyfarfod ar 8 Mawrth. Dim ond dau bwynt rhinwedd oedd yn ein hadroddiad ac, o'r herwydd, bydd fy sylwadau yn y ddadl y prynhawn yma yn fyr. Mae ein pwynt rhinwedd cyntaf yn nodi na fu ymgynghoriad ffurfiol ar y Gorchymyn. Mae ein hadroddiad yn tynnu sylw at nifer o baragraffau yn y memorandwm esboniadol sy'n manylu ar y camau y mae Llywodraeth Cymru wedi eu cymryd, gan gynnwys ysgrifennu at bob awdurdod lleol yng Nghymru. Mae ein hail bwynt rhinwedd yn nodi y bydd awdurdod tai lleol na wnaeth gynnal ei ail asesiad erbyn 24 Chwefror 2021 ar hyn o bryd wedi torri'r ddyletswydd yn adran 101 o Ddeddf Tai (Cymru) 2014 ac y bydd yn parhau i fod wedi torri'r ddyletswydd honno hyd nes y daw'r Gorchymyn i rym ar 18 Mawrth 2021. Diolch, Dirprwy Lywydd.

Rwy'n credu ei bod yn synhwyrol i roi'r 12 mis ychwanegol i alluogi awdurdodau lleol i drafod gyda Sipsiwn a Theithwyr, oherwydd mae'n anodd iawn cael unrhyw ymgynghori ystyrlon tra ein bod o dan y cyfyngiadau presennol, yn enwedig gan nad oes gan lawer ohonyn nhw unrhyw ddyfeisiau rhyngrwyd a fyddai'n galluogi cyfarfodydd Zoom ac ati. Fodd bynnag, rwy'n gobeithio na fydd awdurdodau lleol yn ystyried hyn yn esgus i ohirio'r mater hwn, oherwydd rwy'n credu—. Roeddwn i'n ddiolchgar iawn bod y Gweinidog wedi ysgrifennu ataf mewn ymateb i'r mater a godais ym mis Chwefror yn y Cyfarfod Llawn am y digwyddiad ar y safle yn Queensferry a'r defnydd o gwmnïau diogelwch i orfodi ymddygiad cymunedau yn gysylltiedig â'r rheoliadau coronafeirws, pan mai'r hyn yr oedd ei angen mewn gwirionedd oedd rheoli tai gweddus, a oedd yn amlwg yn absennol yn yr achos hwnnw.

Felly, hoffwn ofyn i'r Dirprwy Weinidog pa un a oes unrhyw awdurdodau lleol nad ydyn nhw hyd yn hyn wedi darparu safle Sipsiwn a Theithwyr yn eu hawdurdod lleol, oherwydd dyma un o'r pethau a ymgorfforwyd yn Neddf Cynllunio (Cymru) 2015, heb sôn am unrhyw ddeddfwriaeth ddilynol. Felly, a allwch chi ddweud wrthym ni, Dirprwy Weinidog, pa un a oes unrhyw awdurdodau lleol o'r fath sydd wedi methu yn eu dyletswydd i ddarparu safleoedd Sipsiwn a Theithwyr, ac, os felly, beth fydd yn cael ei wneud ynglŷn â hynny?

Diolch. Nid oes gennyf unrhyw Aelodau sydd wedi dweud eu bod yn dymuno gwneud ymyriad, felly galwaf ar y Dirprwy Weinidog a'r Prif Chwip i ymateb i'r ddadl. Jane Hutt.

Diolch, Dirprwy Lywydd. A gaf i ddiolch i Mick Antoniw, Cadeirydd y Pwyllgor Deddfwriaeth, Cyfiawnder a'r Cyfansoddiad, a'i bwyllgor am ystyried y Gorchymyn arfaethedig? Dim ond i ymateb i'r ddau bwynt y gwnaethoch chi dynnu sylw atyn nhw a oedd yn haeddu craffu, o ran eich pwynt cyntaf, ar ddiffyg ymgynghori ffurfiol ar y Gorchymyn, mae'n iawn i ddweud nad oes ymgynghoriad ysgrifenedig ffurfiol wedi ei gynnal. Er hynny, rydym wedi ymgysylltu yn eang gydag awdurdodau lleol a gyda chydweithwyr arbenigol eraill yn y trydydd sector ar y mater hwn. Mae cefnogaeth eang i'r Gorchymyn arfaethedig hwn, ac rydym yn ffyddiog bod yr hyblygrwydd sydd wedi ei gynnwys yn ein dull arfaethedig yn golygu y gallwn ni gefnogi awdurdodau lleol ar unrhyw adeg yn eu proses dyletswydd asesu llety. Ac, yn gysylltiedig â'r ail bwynt, bydd awdurdod tai lleol na wnaeth ail asesiad erbyn 24 Chwefror 2021, fel y dywedwch chi, yn torri'r ddyletswydd yn adran 101 o Ddeddf Tai (Cymru) 2014 ar hyn o bryd a bydd yn parhau i fod wedi torri’r ddyletswydd hyd nes y daw'r Gorchymyn i rym. Ond mae awdurdodau tai lleol wedi derbyn hysbysiad ysgrifenedig o'r Gorchymyn arfaethedig i sicrhau ein bod ni'n cynnig cymaint o eglurder ag y gallwn ni o dan yr amgylchiadau presennol, a byddwn ni'n ysgrifennu eto ar ôl canlyniad y bleidlais heddiw.

Rwy'n ddiolchgar am bwyntiau a chwestiynau Jenny Rathbone y prynhawn yma wrth gynnig y cynnig hwn, oherwydd rydym yn parhau i fod yn gwbl ymrwymedig i weithio gydag awdurdodau tai lleol i sicrhau bod gan Sipsiwn a Theithwyr yng Nghymru y gallu i ddefnyddio darpariaeth safleoedd o ansawdd uchel sydd wedi eu teilwra i'w hanghenion ac sy'n briodol yn ddiwylliannol, ac yn wir mae hyn yn ymwneud â mynd i'r afael ag anghenion heb eu bodloni sy'n ymwneud, er enghraifft, â darpariaeth tramwy. Ac er mwyn rhoi sicrwydd i chi, ers i ni greu dyletswydd y Ddeddf tai yn 2014, rydym ni wedi gweld ymhell dros 200 o leiniau newydd naill ai wedi eu creu neu eu hadnewyddu—ac mae'n dda cofnodi hynny y prynhawn yma—ac mae hynny'n cymharu â dim ond llond llaw o leiniau newydd a grëwyd rhwng 1997 a 2014. Nid yw'r cynnydd hwnnw'n digwydd ym mhob rhan o Gymru, ac mae angen i hynny ddigwydd, ac rydym ni wedi darparu cyllid sylweddol i fynd i'r afael â'r angen. Felly, mae fy swyddogion wedi ysgrifennu at y pedwar awdurdod lleol y mae eu cynnydd yn peri'r pryder mwyaf, ac ar hyn o bryd rydym yn gweithio drwy ffyrdd—yn amlwg, o ganlyniad i'r pandemig—y gallwn eu defnyddio i wneud y newid hwnnw drwy gydweithredu a gweithio gydag awdurdodau lleol i nodi a diwallu'r anghenion hyn. Ond mae'n rhaid i ni fynd i'r afael â hyn, a byddwn i'n dweud, o ran camau gweithredu yn y dyfodol, efallai y bydd yn rhaid i ni gymryd cyngor ynghylch y potensial o ddefnyddio pwerau a amlinellir yn y Ddeddf Tai.

Ac yn olaf dim ond i ddweud bod y cyngor yr ydym ni wedi ei gyhoeddi i awdurdodau lleol yn glir, ac mae hyn yn ymwneud â safle Sipsiwn a Theithwyr Riverside yn Sir y Fflint. Mae'n amlwg bod yn rhaid i reoli digwyddiadau COVID-19 ar y safle hwn fod yn seiliedig ar gyfathrebu clir, meithrin ymddiriedaeth a chymryd amser i ofyn pa gymorth sydd ei angen ar breswylwyr. Nid yw defnyddio cwmnïau diogelwch i orfodi ymddygiad cymunedau yn dderbyniol, a gobeithio na fyddwn byth yn clywed am sefyllfa o'r fath eto. Mae'n rhaid i hyn ymwneud â sut yr ydym ni'n hybu rheolaeth a chysylltiadau da rhwng tenantiaid a landlordiaid, sy'n hanfodol er mwyn cyflawni cydymffurfiad iechyd y cyhoedd â rheoliadau COVID-19, ac rwy'n ddiolchgar i TGP Cymru, sydd wedi ymgysylltu â ni ac sydd hefyd yn meithrin yr ymddiriedaeth rhwng gwasanaethau cyhoeddus, Sipsiwn a Theithwyr a chymunedau lleol. Felly, rwyf yn cynnig y cynnig hwn. Diolch yn fawr, Dirprwy Lywydd.

Diolch. Y cynnig yw ein bod yn derbyn y cynnig. A oes unrhyw Aelod yn gwrthwynebu? Nac oes, nid wyf i'n gweld unrhyw wrthwynebiad, felly, o dan Reol Sefydlog 12.36, derbynnir y cynnig.

Derbyniwyd y cynnig yn unol â Rheol Sefydlog 12.36.