Grŵp 5 sydd nesaf; mae'r grŵp yma o welliannau yn ymwneud ag esemptiadau mewn perthynas â meddyginiaeth fferyllol. Gwelliant 2 yw'r prif welliant yn y grŵp yma, a dwi'n galw ar y Gweinidog i gynnig y prif welliant ac i siarad i'r grŵp. Gweinidog. 

Cynigiwyd gwelliant 2 (Julie James).

Diolch, Llywydd. Yng Nghyfnod 2, derbyniais welliant a gyflwynwyd gan Delyth Jewell i leihau nifer yr esemptiadau ar gyfer bagiau siopa plastig untro o'r gwaharddiad a gyflwynwyd gan y Bil, yn benodol i gael gwared ar yr esemptiad sy'n berthnasol pan gaiff claf fag siopa plastig untro pan weinyddir meddyginiaeth neu ddyfais feddygol ar bresgripsiwn, a ddiffinnir fel 'cyfarpar rhestredig' yn y Bil. Fodd bynnag, ar y pryd cydnabuwyd y byddai derbyn y gwelliant hwn yn arwain at anghysondeb gan ei fod yn dal yn caniatáu bagiau plastig untro ar gyfer meddyginiaeth fferyllol, pan nad yw'n cael ei gyflenwi yn unol â phresgripsiwn a roir gan weithiwr iechyd proffesiynol. Felly, rwyf wedi cyflwyno gwelliant 2 i gael gwared ar yr esemptiad ar gyfer meddyginiaeth fferyllol nad yw ar bresgripsiwn i sicrhau bod y gwelliant a gytunwyd yng Nghyfnod 2 yn dechnegol gywir.

Mae gwelliannau 3 a 5 yn welliannau canlyniadol i welliant 2 ac yn dileu'r diffiniadau o 'broffesiynolyn iechyd' a 'meddyginiaeth fferyllol' o Atodlen 1 i'r Bil. Mae gwelliant 4 yn ganlyniadol i welliant Delyth Jewell yng Nghyfnod 2 ac yn dileu'r diffiniad o 'gynnyrch meddyginiaethol' o'r Bil, gan nad oes ei angen mwyach. Ac rwy'n ddiolchgar i Delyth am gyflwyno'r gwelliant. Diolch. 

Does gyda fi ddim siaradwyr ar y grŵp yma, felly y cwestiwn yw: a ddylid derbyn gwelliant 2? A oes unrhyw wrthwynebiad? Nac oes, does yna ddim gwrthwynebiad, ac felly, mae gwelliant 2 yn cael ei dderbyn.

Derbyniwyd y gwelliant yn unol â Rheol Sefydlog 12.36.

Rydym nawr yn symud i welliant 58 a gafodd ei drafod fel rhan o grŵp 4. Delyth Jewell, ydy gwelliant 58 yn cael ei gynnig?

Cynigiwyd gwelliant 58 (Delyth Jewell).

Symud.

Y cwestiwn yw: a ddylid derbyn gwelliant 58? A oes unrhyw wrthwynebiad? [Gwrthwynebiad.] Oes, mae yna wrthwynebiad, felly mi wnawn ni symud i bleidlais ar welliant 58. Agor y bleidlais. Cau'r bleidlais. O blaid 12, neb yn ymatal, 42 yn erbyn. Felly, mae gwelliant 58 wedi ei wrthod.

Gwelliant 58: O blaid: 12, Yn erbyn: 42, Ymatal: 0

Gwrthodwyd y gwelliant