Diolch, Llywydd, ac a gaf i ddiolch i Huw Irranca-Davies am ei gyfraniad a hefyd Jenny Rathbone am ei chyfraniad i'r ddadl heddiw? Rwyf hefyd yn hapus iawn i roi'r sicrwydd y byddaf yn nodi'r hyn yr ydych chi wedi'i ddweud ac yn gwneud beth bynnag a allaf i sicrhau nad ydym yn y sefyllfa hon eto. Felly, mae gennych chi fy ymrwymiad cadarn iawn ar hynny. Fel yr wyf eisoes wedi'i amlygu, nid yw'r offeryn yn gwneud unrhyw newidiadau i bolisi na sut mae busnesau bwyd a bwyd anifeiliaid yn cael eu rheoleiddio, ond rwy'n derbyn nad yw'n ddelfrydol eich bod yn gorfod tynnu sylw at y pwyntiau hyn yn y ffordd y gwnaethoch chi, a byddaf i'n sicr yn gwneud hynny yn y dyfodol.

Jenny, o ran eich pwyntiau chi, byddai'n rhaid i mi ymdrin â'r rheini gyda chi drwy lythyr ynghylch a fyddai hwn yn gyfrwng priodol i ymdrin â'r materion yr ydych chi wedi'u codi, ond rwy'n hapus iawn i wneud hynny. A gaf i ailadrodd fy niolch i'r Pwyllgor Deddfwriaeth, Cyfiawnder a'r Cyfansoddiad am yr adroddiad ac ailadrodd fy ymrwymiad i unioni'r pum pwynt craffu technegol ar y cyfle cyntaf? Gan fod y gwallau yn rhai mân ac nid ydynt yn effeithio'n sylweddol ar allu'r rheoliad arfaethedig na gallu'r ddeddfwriaeth fel y'i diwygiwyd i weithredu, byddwn felly'n gofyn i'r diwygiadau arfaethedig yn yr offeryn hwn gael eu cefnogi. Diolch.