8. A wnaiff Ysgrifennydd y Cabinet ddatganiad am ardrethi busnes mewn perthynas â phrosiectau ynni cymunedol? OAQ(5)0117(FLG)[W]

Diolch yn fawr am y cwestiwn. Mae sawl cynllun ar gael i helpu busnesau bach gydag ardrethi annomestig. Mae dros £210 miliwn o gymorth yn cael ei ddarparu yn 2017-18. Mae’r cynlluniau hyn ar gael i bob busnes sy’n bodloni’r meini prawf, gan gynnwys projectau ynni cymunedol.

Mi fyddwch chi’n ymwybodol bod y sector ynni dŵr cymunedol wedi’i effeithio’n wael iawn wrth i ardrethi busnes cael eu hail-werthuso. Mae dros 92 y cant o gynlluniau hydro yng Nghymru yn wynebu cynnydd anferthol, hyd at 900 y cant. Roedd eich maniffesto chi ar gyfer 2016 yn nodi cefnogaeth eich plaid i gynlluniau ynni cymunedol. A fedrwch chi ymrwymo i gynnig pecyn gostyngiad trethi hael i gefnogi prosiectau ynni cymunedol yng Nghymru, fel sy’n digwydd yn yr Alban? Mi fyddai hyn yn help mawr, ac yn gyfle i’ch Llywodraeth gefnogi’r sector mewn gweithred yn ogystal â gair.

Wel, diolch yn fawr am y cwestiwn ychwanegol yna, ac, wrth gwrs, rydw i’n ymwybodol o’r pethau mae pobl yn y sector yn eu dweud. Mae fy nghydweithwraig i Lesley Griffiths wedi cyfarfod â’r grŵp gorchwyl a gorffen ar ynni dŵr i drafod yr adroddiad ar fesurau i gefnogi’r diwydiant ynni dŵr yng Nghymru, ac rydw i’n gwybod ei bod hi’n mynd i gynnal cyfarfod pellach gyda’r grŵp. Yn y cyfamser, mae ei swyddogion hi, a fy swyddogion i hefyd, yn parhau i weithio gyda chynrychiolwyr diwydiant projectau ynni cymunedol i asesu effaith yr ymarfer ailbrisio 2017 gan Asiantaeth y Swyddfa Brisio. Wrth gwrs, rydw i wedi dweud yn barod, Dirprwy Lywydd: rydym ni’n mynd i baratoi cynllun parhaol newydd ar ryddhad ardrethi busnesau bach o 2018 ymlaen, ac rydw i’n fodlon, fel rhan o’r cynllun parhaol newydd, ystyried yr achos ar gyfer cymorth benodol i rai busnesau, gan gynnwys projectau ynni cymunedol ac ynni dŵr. A hefyd, bydd hyn yn cynnwys asesiad o’r sefyllfa yn yr Alban.

Diolch yn fawr iawn, Ysgrifennydd y Cabinet.