Mae'r grŵp nesaf o welliannau yn ymwneud â chyfyngiadau ar roi hysbysiad adennill meddiant. Y prif welliant yn y grŵp hwn yw gwelliant 46. Galwaf ar David Melding i gynnig a siarad am y prif welliant a'r gwelliannau eraill yn y grŵp. David.

Cynigiwyd gwelliant 46 (David Melding).

Diolch, Dirprwy Lywydd, ac rwy'n hapus iawn i gynnig y ddau welliant yn y grŵp hwn, sydd wedi eu datblygu mewn cydweithrediad agos â'r Gweinidog a'i thîm. A gwn fy mod wedi dweud rhai pethau miniog, ond rwy'n gobeithio fy mod wedi dweud llawer o bethau mwy adeiladol am y ddeddfwriaeth hon, ac rwyf yn credu ei bod hi'n arwydd da pan fydd y Llywodraeth yn cefnogi gwelliant a ysbrydolwyd gan un o'r gwrthbleidiau.

Mae'r gwelliant yn deillio o un a gyflwynwyd gennyf yng Nghyfnod 2, sydd wedi'i ehangu i gymeradwyo rhai anghysondebau yn Neddf Rhentu Cartrefi (Cymru) 2016 sydd hefyd yn berthnasol i'r mater hwn. Mae'r gwelliannau hyn yn atal y landlord rhag cyflwyno hysbysiad adennill meddiant i'r tenant pan fo taliad gwaharddedig wedi'i wneud a heb ei ad-dalu wedi hynny. Rwy'n credu bod y gwelliannau hyn yn taro cydbwysedd angenrheidiol, hyd yn oed pan fo taliad gwaharddedig wedi'i wneud drwy gamgymeriad, oherwydd mae'r cyfyngiad hwn yn dod i ben ar yr adeg y caiff hwnnw ei ad-dalu. Yn ogystal â hyn, cawsom wybod yn y Cyfnod Pwyllgor y ceir rhai amgylchiadau a nodir mewn darnau eraill o ddeddfwriaeth tai sy'n rhwystro landlord rhag terfynu tenantiaeth oherwydd nad yw wedi cydymffurfio â'r gyfraith. Felly, ar y lleiaf, mae'r gwelliannau hyn yn darparu cysondeb â darnau eraill o ddeddfwriaeth, ac yn cynnig cam diogelu i denantiaid, ac rwy'n diolch i'r Gweinidog am estyn ar draws ffiniau pleidiau i gael y newidiadau pwysig hyn wedi'u cynnwys. Ac rwy'n annog yr Aelodau i gefnogi'r gwelliannau hyn.

Rwyf eisiau mynegi fy niolch i David Melding am gyflwyno gwelliannau 46 a 54, sy'n mynd i'r afael â mater y bu iddo helpu eu canfod yng Nghyfnod 2. Rwyf wedi bod yn falch iawn o weithio gyda David i gynhyrchu gwelliant sy'n gweithio ochr yn ochr â darpariaethau presennol i gyfyngu ar hawl landlord i adennill meddiant o eiddo pe byddai'n codi taliadau gwaharddedig ar ddeiliaid contract. Mae'r Bil ar hyn o bryd yn cynnwys darpariaeth i gyfyngu ar roi hysbysiad adennill meddiant o dan adran 173 o Ddeddf Rhentu Cartrefi (Cymru) 2016 yn gysylltiedig â chontract safonol cyfnodol a rhoi hysbysiad o dan gymal terfynu'r landlord. Bydd y cyfyngiadau hynny'n gymwys os bydd landlord yn gofyn am dâl gwaharddedig ac nad yw'n ei ad-dalu, neu os na chaiff blaendal cadw ei ad-dalu yn unol â'r Bil.

Mae gwelliant 54 hefyd yn rhoi cyfyngiad ar roi hysbysiad yn gysylltiedig â diwedd contractau tymor penodol o dan adran 186 o Ddeddf 2016, sydd i'w groesawu, ac yn rhoi amddiffyniad pellach i ddeiliaid contract pan fo achosion o dorri'r Bil. Mae'n well rhoi'r holl welliannau hyn gyda'i gilydd yn y Bil o ystyried bod pob un ohonyn nhw'n diwygio Deddf Rhentu Cartrefi (Cymru) 2016, ac rwy'n eu cymeradwyo i'r tŷ, a diolch i David Melding unwaith eto am ei gydweithrediad.

David. Na? Diolch. Os derbynnir gwelliant 46, mae gwelliannau 23 a 24 yn methu. Y cwestiwn yw bod gwelliant 46 yn cael ei dderbyn, a oes unrhyw Aelod yn gwrthwynebu? Nac oes, felly, derbyniwyd gwelliant 46 ac mae gwelliannau 23 a 24 yn methu.

Derbyniwyd y gwelliant yn unol â Rheol Sefydlog 12.36.

Methodd gwelliannau 23 a 24.

David Melding, gwelliant 54?

Cynigiwyd gwelliant 54 (David Melding).

Cynnig.

Y cwestiwn yw bod gwelliant 54 yn cael ei dderbyn. A oes unrhyw Aelod yn gwrthwynebu? Na. Felly, derbyniwyd gwelliant 54.

Derbyniwyd y gwelliant yn unol â Rheol Sefydlog 12.36.