Gwych. Perffaith. Diolch. Mae'n ddrwg iawn gennyf, nid wyf yn clywed y Llywydd o gwbl. 

A gaf fi ddechrau, Lywydd, drwy ddweud y byddwn fel arfer yn agor fy sylwadau mewn dadl fel hon drwy ddiolch i ba blaid bynnag sydd wedi cyflwyno'r ddadl am wneud hynny? Fodd bynnag, mae'n rhaid i mi fod yn onest, mae ychydig yn anodd gwybod ble i ddechrau heddiw gyda chynnig Plaid Cymru. Mae'n cwmpasu cynifer o faterion gwahanol a chwbl ddigyswllt weithiau fel na ellir trafod yr un ohonynt o ddifrif mewn ffordd werth chweil mewn amser mor fyr, sy'n drueni mawr, oherwydd mae'r elfennau unigol yn haeddu eu trafod yn wir. Ond mae'n fy atgoffa o'r cyngor, pan fydd gennych ormod o flaenoriaethau, nad oes gennych yr un i bob pwrpas, ac mae'n ddrwg gennyf ddweud bod y cynnig hwn heddiw, mewn ffordd, yn perthyn i'r categori hwnnw. Ac am y rhesymau hyn, byddwn yn pleidleisio yn erbyn y cynnig yn ei gyfanrwydd heddiw. A gaf fi ddweud, serch hynny, fy mod yn llongyfarch y Ceidwadwyr am eu hymdrech orchestol i geisio diwygio'r hyn sy'n teimlo, bron, fel cynnig na ellir ei ddiwygio? Ond Lywydd dros dro, fe geisiaf ymdrin ag o leiaf rai o'r materion a godwyd yn y cynnig y prynhawn yma. 

Rwy'n ymwybodol iawn o ba mor anodd fu'r cyfnod hwn i bawb sy'n ymwneud ag addysg, yn staff a dysgwyr fel ei gilydd. Ond rydym wedi rhoi nifer o fesurau ar waith i liniaru effeithiau'r pandemig. Fe fyddwch i gyd yn ymwybodol o'r penderfyniadau anodd y bu'n rhaid i ni eu gwneud yn y dyddiau diwethaf i weithredu'r cyfnod atal byr dros yr wythnosau nesaf, ac rydym wedi gwneud ein gorau i aflonyddu gyn lleied â phosibl. Byddwn yn cyhoeddi canllawiau ar ein disgwyliadau ar gyfer dysgu dros y cyfnod hwn. I ddysgwyr mewn blynyddoedd arholiadau, ein prif flaenoriaeth yw sicrhau bod ganddynt y wybodaeth, y sgiliau a'r cymwysterau sydd eu hangen arnynt i gamu ymlaen i gam nesaf eu haddysg neu eu hyfforddiant neu eu cyflogaeth, a chan adeiladu ar yr adnoddau sydd eisoes ar gael i ysgolion, dyna pam ein bod wedi darparu £3.2 miliwn ychwanegol o gyllid cyfalaf i addysg bellach a dysgu oedolion ddiwedd yr haf hwn. Bydd y cyllid hwn yn helpu ein sefydliadau addysg bellach i gynorthwyo dysgwyr i barhau i ddysgu gartref o bell. Gwn nad yw dysgu ar-lein yn briodol ar gyfer pob cwrs nac i bob dysgwr, ac rwy'n disgwyl i golegau ac ysgolion sicrhau eu bod yn ymateb i amgylchiadau dysgwyr unigol lle bynnag y bo modd.