2. A wnaiff y Comisiwn ddatganiad am waith sy’n cael ei wneud i hyrwyddo mynediad a dealltwriaeth y cyhoedd o waith y Cynulliad? OAQ(5)0007(AC)[W]

Mae'r Comisiwn yn ymrwymedig i ymgysylltu â phawb yng Nghymru ac mae hyrwyddo’r Cynulliad yn un o’n prif flaenoriaethau. Cafodd strategaeth ymgysylltu â’r cyhoedd newydd ei chymeradwyo ym mis Ionawr, sy’n cynnwys dwy fenter newydd allweddol, sef sefydlu senedd ieuenctid i Gymru a chyflawni argymhellion y tasglu gwybodaeth a newyddion digidol y disgwylir iddo gyflwyno adroddiad yn y tymor yma.

Diolch i’r Llywydd am yr ateb. Mae’n bosibl ei bod yn rhy hwyr ar gyfer ambell i berson y gwnes i gwrdd â nhw yn sioe Nefyn ddydd Llun, a oedd yn dal ddim yn credu’r gwahaniaeth rhwng y Cynulliad a’r Llywodraeth, ond, gyda’r to ifanc, ar gyfer pobl ifanc, mae’n hynod o bwysig eu bod yn gweld y gwaith rŷm ni’n ei wneud yma fel Cynulliad. Felly, roeddwn yn croesawu’r ffaith bod staff Comisiwn y Cynulliad yn y sioe ddydd Llun yn hyrwyddo’r ymgynghoriad sydd ar gael nawr ar senedd i bobl ifanc Cymru. A wnaiff y Llywydd felly amlinellu mwy o’r amcanion ar gyfer sefydlu senedd o’r fath, ac yn arbennig sut y bydd senedd o’r fath yn gallu cynrychioli pobl ifanc yn y gwahanol ardaloedd ac etholaethau yng Nghymru?

Diolch i’r Aelod am y cwestiwn, sydd yn amserol hefyd, fel mae’n digwydd, gan ein bod ni, fel Comisiwn a Chynulliad, wedi cychwyn ar yr ymgynghoriad gyda phobl yng Nghymru—pobl ifanc yng Nghymru yn benodol—ar sut y byddwn yn ei sefydlu, a pha fath o senedd ieuenctid yr ŷm ni yn mynd i’w sefydlu yma, i gyd-redeg gyda’n Cynulliad ni. Rŷm ni wedi cychwyn ar yr ymgynghoriad yna yn Ysgol Bro Pedr ddydd Gwener diwethaf. Rwy’n falch bod sioe Nefyn wedi bod yn gyfle hefyd i gysylltu’n uniongyrchol â phobl ifanc. Bydd yr ymgynghoriad yna yn mynd ymlaen tan ddiwedd mis Mehefin. Felly, rwy’n annog pob Aelod Cynulliad fan hyn i sicrhau bod pobl ifanc yn eich etholaethau a’ch rhanbarthau yn cymryd rhan, yn rhannu eu barn nhw ar ba fath o senedd ieuenctid yr ŷm ni eisiau ei gweld yma yng Nghymru. Pobl ifanc Cymru wnaeth ofyn i ni fel Aelodau Cynulliad i sefydlu senedd ieuenctid yma yng Nghymru yn y lle cyntaf. Rŷm ni eisiau iddyn nhw deimlo perchnogaeth o’r senedd ieuenctid yna o’r cychwyn cyntaf, ac rwy’n gobeithio, wrth inni symud ymlaen i wrando ar eu barn nhw, yn ffurfio’r senedd ieuenctid yna, y byddwn ni’n gallu gwneud hynny wrth fynd drwy’r hydref, ac y bydd ein senedd ieuenctid ni yma yng Nghymru am y tro cyntaf yn cael ei sefydlu ar gychwyn 2018.

Diolch yn fawr iawn. Diolch.