Dychwelwn yn awr at ein hagenda, ac eitem 8 ar yr agenda yw Rheoliadau Iechyd Planhigion (Diwygio) (Cymru) (Ymadael â'r UE) 2019, a galwaf ar Weinidog yr Amgylchedd, Ynni a Materion Gwledig i gynnig y cynnig—Lesley Griffiths.

Cynnig NDM6992—Rebecca Evans

Cynnig bod Cynulliad Cenedlaethol Cymru, yn unol â Rheol Sefydlog 27.5

1. Yn cymeradwyo bod y fersiwn ddrafft o Reoliadau Iechyd Planhigion (Diwygio) (Cymru) (Ymadael â’r UE) 2019 yn cael ei llunio yn unol â’r fersiwn ddrafft a osodwyd yn y Swyddfa Gyflwyno ar 20 Chwefror 2019.  

Cynigiwyd y cynnig.

Diolch, Dirprwy Lywydd. Mae'r rheoliadau hyn yn gwneud gwelliannau i Orchymyn Iechyd Planhigion (Cymru) 2018 a Rheoliadau Iechyd Planhigion etc. (Ffioedd) (Cymru) 2018. Bydd y Rheoliadau hyn yn sicrhau bod deddfwriaeth iechyd planhigion yng Nghymru, sy'n sicrhau bod mesurau amddiffynnol presennol yr UE i atal cyflwyno a lledaenu organebau sy'n niweidiol i blanhigion neu gynhyrchion planhigion yn parhau i fod mewn grym ar ôl i'r DU ymadael â'r UE mewn sefyllfa 'dim cytundeb'. Mae llawer o'r rheoliadau hyn yn cywiro diffygion mewn deddfwriaeth ddomestig, sy'n gweithredu'r gyfarwyddeb iechyd planhigion sy'n deillio o ymadawiad y DU o'r UE. Mae'r newidiadau yn sicrhau y gall deunydd planhigion barhau i gael ei fewnforio yn ddiogel i Gymru a symud yn ddiogel o fewn y wlad ar ôl ymadael â'r UE, gan gynnwys parhau i fewnforio deunydd planhigion o aelod-wladwriaethau'r UE a'r Swistir.

Mae'n ofynnol i ddeunydd sy'n cynnal y plâu a'r clefydau mwyaf difrifol fod â phasbort planhigion yr UE i hwyluso ei symudiad. Bydd planhigion a chynhyrchion planhigion a reolir ar hyn o bryd o dan drefn pasbort planhigion yr UE pan fyddant yn symud i Gymru o aelod-wladwriaethau'r UE a'r Swistir yn destun rheolaethau mewnforio a fydd yn disodli'r sicrwydd a'r gallu i olrhain y mae trefn pasbort planhigion yr UE yn eu cynnig. Mae'r rheoliadau hyn hefyd yn trosi darpariaethau yn ymwneud â phlannu rhywogaethau penodol: tatws, tomatos a phlanhigion eraill teulu'r codwarth a rheoli plâu planhigion perthnasol. Yn olaf, mae'r rheoliadau hyn hefyd yn gwneud gwelliannau canlyniadol i'r ffioedd presennol a nodir yn Rheoliadau Iechyd Planhigion etc. (Ffioedd) (Cymru) 2018, gan ddileu'r cyfeiriadau at ddeddfwriaeth yr UE, gan felly sicrhau'r gallu i'w gweithredu'n gyfreithiol ar ôl ymadael.

Galwaf ar Dai Lloyd i siarad ar ran y Pwyllgor Materion Cyfansoddiadol a Deddfwriaethol.

Diolch yn fawr, Dirprwy Lywydd. Dyma'r Rheoliadau Iechyd a Lles Anifeiliaid (Diwygiadau Amrywiol) (Cymru) (Ymadael â’r UE) 2019. Nawr, trafodwyd y rheoliadau hyn yn ein cyfarfod fel y Pwyllgor Materion Cyfansoddiadol a Deddfwriaethol ar 18 Mawrth. Cyflwynwyd adroddiad i’r Cynulliad ar saith pwynt technegol ac un pwynt adrodd o ran rhinweddau o dan Reol Sefydlog 21.3. Mae tri o'r saith pwynt adrodd technegol yn ymwneud â'r ffaith ei bod yn ymddangos fod anghysondebau rhwng ystyr y testunau Cymraeg a'r Saesneg. Mae'r pedwar pwynt adrodd technegol arall yn ymwneud â drafftio diffygiol posibl o fewn y rheoliadau.

Mae'r pwynt adrodd o ran rhinweddau y cyflwynwyd adroddiad arno i'r Cynulliad yn nodi bod y rheoliadau hyn yn creu dwy drosedd newydd. Mae'r Llywodraeth wedi ymateb i'r pwyntiau technegol yn ein hadroddiad. Nodwn o ran pwyntiau 1, 2 a 4 y bydd y Llywodraeth yn cywiro'r gwallau a nodwyd gennym. Wrth nodi pwyntiau 3, 5, 6 a 7, hoffem hefyd dynnu sylw'r Cynulliad at y ffaith bod y Llywodraeth o'r farn nad yw'r gwallau drafftio yn effeithio ar effaith gyfreithiol y darpariaethau. Diolch yn fawr. 

Diolch. Galwaf ar Weinidog yr Amgylchedd, Ynni a Materion Gwledig i ymateb i'r ddadl.

Diolch, Dirprwy Lywydd, a diolch i chi, Dai Lloyd, am y sylwadau yna. Rydym ni'n cytuno yn llwyr a byddwn yn cywiro pwynt 1. Pwyntiau 2 a 4: rydym ni'n cytuno ac rydym ni'n ceisio cywiro'r gwallau drwy reoliad 8(4) a (6) o Reoliadau Materion Gwledig (Diwygiadau Amrywiol) (Cymru) (Ymadael â'r UE) 2019. Ac rydym yn nodi pwyntiau 3, 5, 6 a 7, ac rydym o'r farn nad ydynt yn effeithio ar effaith gyfreithiol y darpariaethau, fel y dywedasoch chi.

Diolch. Y cynnig yw derbyn y cynnig. A oes unrhyw Aelod yn gwrthwynebu? Nac oes. Felly, derbynnir y cynnig yn unol â Rheol Sefydlog 12.36.

Derbyniwyd y cynnig yn unol â Rheol Sefydlog 12.36.

Trown yn awr at y cyfnod pleidleisio. Oni bai bod tri Aelod yn dymuno i'r gloch gael ei chanu, bwriadaf fwrw ymlaen i'r cyfnod pleidleisio. Na. Iawn, iawn.