Grŵp 10 yw'r grŵp nesaf o welliannau—y gwelliannau yma'n ymwneud â phwerau gwneud rheoliadau. Gwelliant 20 yw'r prif welliant, a'r unig welliant. Llyr Gruffydd i gynnig y gwelliant. 

Cynigiwyd gwelliant 20 (Llyr Gruffydd).

Diolch, Llywydd. Dwi'n cynnig gwelliant 20.

Mae adran 65 o'r Bil yn cyfeirio at yr ombwdsmon yn gweithio ar y cyd â phersonau penodedig. Mae is-adran 2 yn manylu'r personau penodedig y mae’n ofynnol i’r ombwdsmon eu hysbysu ac ymgynghori â nhw wrth ymchwilio i faterion y gallai’r personau penodedig hynny gynnal ymchwiliad amdanyn nhw. Mae'r rhain wedi’u nodi ar wyneb y Bil, wrth gwrs, sef y comisiynydd plant, y comisiynydd pobl hŷn, comisiynydd cenedlaethau’r dyfodol, Comisiynydd y Gymraeg, a, lle mae’r mater yn ymwneud ag iechyd a gofal cymdeithasol, Gweinidogion Cymru.

Nawr, mae modd diwygio is-adran 2 drwy reoliad yn ddarostyngedig i’r weithdrefn gadarnhaol er mwyn ychwanegu neu ddileu person penodedig. Diben y gwelliant hwn yn syml yw cadarnhau, er eglurder, fod rheoliadau a wneir o dan adran 65(6) i'w gwneud gan Weinidogion Cymru.

Y Gweinidog.

Mae'r gwelliant hwn yn gwella ddrafft y Bil, gan roi pŵer rheoleiddio penodol ar wyneb y Bil, yn hytrach na dweud yn syml y gellir gwneud rheoliadau. Rwy'n hapus iawn i gefnogi'r gwelliant hwn.

Dim ymateb oddi wrth Llyr Gruffydd. Y cwestiwn yw: a ddylid derbyn gwelliant 20? A oes unrhyw wrthwynebiad? Felly, derbynnir gwelliant 20. 

Derbyniwyd y gwelliant yn unol â Rheol Sefydlog 12.36.