Mae'r grŵp nesaf o welliannau yn ymwneud ag awdurdodau gorfodi a rhannu gwybodaeth, a'r prif welliant yn y grŵp hwn yw gwelliant 45. Galwaf ar David Melding i gynnig ac i siarad am y prif welliant a rhai eraill yn y grŵp hwn—David.

Cynigiwyd gwelliant 45 (David Melding).

Diolch, Dirprwy Lywydd. Mae'r prif welliant yn y grŵp hwn, gwelliant 45, yn gosod dyletswydd ar awdurdodau lleol i hysbysu Rhentu Doeth Cymru pan gaiff cosb benodedig ei thalu. Yn ystod Cyfnod Pwyllgor y Bil hwn, fe wnaethom ni gytuno â Rhentu Doeth Cymru bod angen i'r broses gael ei thynhau i sicrhau, pan gaiff hysbysiad cosb benodedig ei thalu, bod Rhentu Doeth Cymru yn cael gwybod. Bydd hyn yn helpu gyda'u gwaith casglu gwybodaeth ac yn gwneud y system yn llawer mwy cadarn. Yn ystod Cyfnod 2, dywedodd y Gweinidog—ac rwy'n dyfynnu—

Wel, mewn gwirionedd, mae'r ddyletswydd honno eisoes yn bodoli oherwydd mae'n rhaid i'r awdurdod lleol drosglwyddo gwybodaeth i Rhentu Doeth Cymru ac ni chaiff ei dal yn ôl.

Ond mae'n ymddangos i mi fod hyn yn oddefol iawn, a dylem ni roi'r egwyddor hon ar wyneb y Bil. Ni chefais sicrwydd gan sylwadau eraill a wnaed gan y Gweinidog.

Unwaith eto, yn yr hyn y dywedodd y Gweinidog ynghylch pam yr oedd hi o'r farn bod y polisi yn ddigon cryf ar hyn o bryd, soniodd hi am Rhentu Doeth Cymru yn gofyn i'r awdurdod lleol am yr wybodaeth hon, ac eto, nid yw hynny'n ddyletswydd. Mae'n rhaid iddyn nhw wneud y cais. Sut maen nhw'n gwybod bod hysbysiad cosb benodedig wedi'i gyflwyno a'i dalu? Byddai angen iddynt fod â chweched synnwyr, yn ôl pob tebyg, i ofyn am yr wybodaeth honno, ac mae'n hysbysiad pwysig iawn mewn gwirionedd. A beth yw hyn mewn gwirionedd? Mae'n rhaid i'r awdurdod lleol anfon neges e-bost at Rhentu Doeth Cymru yn dweud bod hysbysiad cosb benodedig wedi'i gyflwyno ac wedyn wedi'i dalu, a gall hynny wedyn, yn amlwg, fod yn rhan o'r cofnod a gedwir ar y landlord neu'r asiant gosod. Rwy'n credu bod troseddau ailadroddus, hyd yn oed os y'u hystyrir yn fân droseddau, os ydyn nhw'n cael eu hailadrodd, dro ar ôl tro, dro ar ôl tro, eu hunain yn gyfystyr â throsedd difrifol. Felly, rwy'n credu bod casglu gwybodaeth yn bwysig iawn, iawn i gydnerthedd y system hon, ac a dweud y gwir rwyf mewn penbleth pam nad yw'r Llywodraeth wedi derbyn y gwelliant hwn. Ond, Dirprwy Lywydd, rwyf wedi gorfod dysgu byw gyda llawer o siomedigaethau yn fy swyddogaeth yn y fan yma. [Chwerthin.]

Galwaf ar y Gweinidog.

Diolch, Dirprwy Lywydd. Mae adran 14 o'r Bil yn ei gwneud hi'n ofynnol i awdurdod tai lleol hysbysu'r awdurdod trwyddedu, neu bob awdurdod trwyddedu os oes mwy nag un, o unrhyw euogfarn o drosedd o dan y Ddeddf yn gysylltiedig ag annedd yn ei ardal. Mae hyn yn sicrhau cysylltiad priodol rhwng y Bil ac arfer swyddogaethau gorfodi yn gysylltiedig â chofrestru a thrwyddedu landlordiaid a thenantiaid. Mae gwelliant 17 o f'eiddo yn cyflwyno is-adran newydd, is-adran (3) i adran 14. Yr effaith yw na fydd yn rhaid i awdurdod tai lleol hysbysu awdurdod trwyddedu o euogfarn os cafodd yr achos ei ddwyn gan yr awdurdod trwyddedu. Mae'r gwelliant hwn yn perthyn i'r gwelliannau yng ngrŵp 9, sy'n darparu ar gyfer yr awdurdod trwyddedu i fod yn awdurdod gorfodi o dan y Bil. Os nad ydym yn gwneud gwelliant 17, byddai'r Bil yn ei gwneud hi'n ofynnol i awdurdod tai lleol gymryd camau gweithredu sy'n gwbl ddiangen. Hyderaf y bydd yr Aelodau'n cefnogi'r gwelliant.

Mae gwelliant 45, a gyflwynwyd gan David Melding, yn ceisio ei gwneud hi'n ofynnol i awdurdod tai lleol hysbysu'r awdurdod trwyddedu pan fydd hysbysiad cosb benodedig wedi ei dalu. Yng Nghyfnod 2, fe wnaethom ni wrthod gwelliant tebyg iawn oherwydd bod adran 36 o Ddeddf Tai (Cymru) 2014 eisoes yn gosod dyletswydd ar awdurdodau tai lleol i drosglwyddo unrhyw wybodaeth i'r awdurdod trwyddedu sy'n angenrheidiol at ddibenion arfer ei swyddogaethau o dan Rhan 1 o'r Ddeddf. Bydd hyn yn berthnasol i unrhyw wybodaeth sydd wedi'i derbyn gan awdurdod tai lleol wrth arfer ei swyddogaethau fel awdurdod tai lleol.

Mae'r gwelliant hwn, yn ogystal â bod yn ddi-angen, hefyd yn rhoi pwysigrwydd i'r ffaith a yw hysbysiad cosb benodedig wedi'i dalu ai peidio. Fodd bynnag, y gwir amdani yw mai'r hyn sydd o'r diddordeb mwyaf i awdurdod gorfodi yw a yw hysbysiad cosb benodedig wedi'i gyflwyno. Hyn ynghyd ag erlyniadau, yw'r materion sydd fwyaf perthnasol i Rhentu Doeth Cymru wrth iddynt ystyried a yw rhywun yn berson addas a phriodol i ddal trwydded.

Mae gwelliant 21 o f'eiddo yn darparu ar gyfer y caniatâd angenrheidiol i awdurdod trwyddedu ac awdurdod tai lleol rannu gwybodaeth yn rhan o'u gwaith gorfodi. Fel y soniwyd, mae adran 36 o Ddeddf Tai (Cymru) 2014 eisoes yn caniatáu i awdurdod trwyddedu ofyn am wybodaeth gan awdurdod tai lleol i'w helpu i arfer ei swyddogaethau o dan Ran 1 o'r Ddeddf honno. Mae'r gwelliant hwn yn darparu pŵer cyffelyb yn gysylltiedig â galluogi awdurdodau gorfodi i arfer eu swyddogaethau o dan y Bil. Bydd yn gwella effeithiolrwydd y cydweithio rhwng awdurdodau gorfodi, a gobeithiaf y bydd yr Aelodau yn cefnogi'r newid hwn. Rwyf felly yn annog Aelodau i gefnogi gwelliannau 17 a 21 a gwrthod gwelliant 45, nad oes ei angen, ond mae'n ddrwg gennyf siomi David Melding yn hyn o beth.

David i ymateb i'r ddadl? Na. Iawn. Y cwestiwn yw bod gwelliant 45 yn cael ei dderbyn. A oes unrhyw Aelod yn gwrthwynebu? [Gwrthwynebiad.] Felly awn ymlaen i bleidlais electronig. Agorwch y bleidlais. Caewch y bleidlais. O blaid y gwelliant 20, neb yn ymatal, 28 yn erbyn, felly ni chaiff gwelliant 45 ei dderbyn.

Gwelliant 45: O blaid: 20, Yn erbyn: 28, Ymatal: 0

Gwrthodwyd y gwelliant

Gweinidog, gwelliant 16.

Cynigiwyd gwelliant 16 (Julie James).

Yn ffurfiol.

Y cwestiwn yw bod gwelliant 16 yn cael ei dderbyn. A oes unrhyw Aelod yn gwrthwynebu? Na, felly derbynnir gwelliant 16.

Derbyniwyd y gwelliant yn unol â Rheol Sefydlog 12.36.

Gweinidog, gwelliant 17.

Cynigiwyd gwelliant 17 (Julie James).

Yn ffurfiol.

Y cwestiwn yw bod gwelliant 17 yn cael ei dderbyn. Unrhyw Aelod yn gwrthwynebu? [Gwrthwynebiad.] Gwrthwynebiad, felly awn ymlaen i bleidlais electronig ar welliant 17. Agorwch y bleidlais. Caewch y bleidlais. O blaid y cynnig 39, neb yn ymatal, 9 yn erbyn. Felly, derbynnir gwelliant 17.

Gwelliant 17: O blaid: 39, Yn erbyn: 9, Ymatal: 0

Derbyniwyd y gwelliant

Gweinidog, gwelliant 18.

Cynigiwyd gwelliant 18 (Julie James).

Yn ffurfiol.

Y cwestiwn yw bod gwelliant 18 yn cael ei dderbyn. A oes unrhyw Aelod yn gwrthwynebu? Felly, derbyniwyd gwelliant 18.

Derbyniwyd y gwelliant yn unol â Rheol Sefydlog 12.36.

Gweinidog, gwelliant 19.

Cynigiwyd gwelliant 19 (Julie James).

Yn ffurfiol.

Y cwestiwn yw bod gwelliant 19 ei cael ei dderbyn. A oes unrhyw Aelod yn gwrthwynebu? Derbyniwyd gwelliant 19.

Derbyniwyd y gwelliant yn unol â Rheol Sefydlog 12.36.

Gweinidog, gwelliant 20.

Cynigiwyd gwelliant 20 (Julie James).

Yn ffurfiol.

Y cwestiwn yw bod gwelliant 20 ei cael ei dderbyn. A oes unrhyw Aelod yn gwrthwynebu? Derbyniwyd gwelliant 20.

Derbyniwyd y gwelliant yn unol â Rheol Sefydlog 12.36.

Gweinidog, gwelliant 21.

Cynigiwyd gwelliant 21 (Julie James).

Yn ffurfiol.

Y cwestiwn yw bod gwelliant 21 ei cael ei dderbyn. A oes unrhyw Aelod yn gwrthwynebu? Na, felly, derbyniwyd gwelliant 21.

Derbyniwyd y gwelliant yn unol â Rheol Sefydlog 12.36.