Sy'n dod â ni at grŵp 13, y grŵp olaf o welliannau, sy'n ymwneud â throsolwg. Gwelliant 1 yw'r unig welliant yn y grŵp yma. Llyr Gruffydd i gynnig y gwelliant. 

Cynigiwyd gwelliant 1 (Llyr Gruffydd).

Diolch yn fawr, Llywydd. Dwi’n cynnig gwelliant 1. Yn ystod trafodion Cyfnod 2, fe gytunwyd ar welliant i fewnosod adran 71 yn y Bil, sy’n rhoi’r awdurdod i gyflwyno hysbysiad cydymffurfio i'r ombwdsmon mewn perthynas â safonau’r Gymraeg. Mae’r gwelliant hwn—gwelliant rhif 1 dŷn ni'n ei drafod nawr yn y grŵp yma—yn diweddaru adran 1 er mwyn sicrhau bod adran drosolwg y Bil yn adlewyrchu cynnwys y Bil yn gywir. Mae e yn gynnig ddigon hawdd ac rwy'n hyderus y bydd Aelodau'n ei gefnogi. 

Gweinidog.

Rwy'n hapus i gefnogi'r gwelliant hwn, sy'n diweddaru trosolwg y Bil i adlewyrchu gwelliant y Llywodraeth a gytunwyd yng Nghyfnod 2, sy'n dwyn yr ombwdsmon o dan y safonau iaith Gymraeg.

Hoffwn gofnodi fy niolch i'r Aelod cyfrifol am y gwaith manwl a wnaeth ef a thîm y Cynulliad sy'n ei gefnogi ar y cyd â'r Llywodraeth ar wella'r Bil hwn. Rhwng Cyfnodau 2 a 3, mae Llyr Gruffydd wedi cyflwyno dros 250 o welliannau, gyda'r nod o sicrhau y bydd y Bil hwn yn cyflawni ei amcanion yn effeithiol ac y bydd yn gyfraith dda os caiff ei derbyn gan y Cynulliad Cenedlaethol. Rwy'n gobeithio y bydd yr Aelodau'n cefnogi'r gwelliant olaf hwn heddiw ac yn cefnogi hynt y Bil.

Ydy Llyr Gruffydd eisiau ymateb? 

Dim ond i ategu, os caf i, Llywydd, fy niolchiadau i bawb sydd wedi ymgysylltu â'r broses hyd yma. Diolch yn arbennig hefyd i glercod a thîm cyfreithiol y Pwyllgor Cyllid am eu cefnogaeth a'u holl gwaith wrth ddod â ni i'r pwynt hwn yn y broses. A gaf i hefyd ddiolch i Aelodau am eu cefnogaeth i'r gwelliannau dwi wedi'u cynnig heddiw, gan obeithio y gwelwch chi i gyd eich ffordd yn glir, wrth gwrs, i gefnogi'r un gwelliant bach sydd ar ôl? Diolch, Llywydd. 

Y cwestiwn yw: a ddylid derbyn yr un gwelliant bach yna sydd ar ôl, sef gwelliant 1? A oes unrhyw wrthwynebiad? Derbynnir gwelliant 1. 

Derbyniwyd y gwelliant yn unol â Rheol Sefydlog 12.36.

Sy'n dod â ni at ddiwedd ein hystyriaeth o Gyfnod 3 y Bil Ombwdsmon Gwasanaethau Cyhoeddus (Cymru). Dwi'n datgan bod pob adran o'r Bil a phob Atodlen wedi eu derbyn. Daw hynny â thrafodion y Cyfnod 3 yma i ben. 

Barnwyd y cytunwyd ar bob adran o’r Bil.